Miljoene se vergoeding vir Esidimeni-slagoffers

Oudregter Dikgang Moseneke. Foto: Brenda Masilela/ANA

Oudregter Dikgang Moseneke het beveel dat die families van die pasiënte wat in die Life Esidimeni-tragedie dood is sowel as die oorlewende pasiënte en hul families R1,2 miljoen elk as vergoeding moet ontvang.

Moseneke wat die bemiddelingsverhoor lei, het beveel dat die provinsiale regering R20 000 moet betaal vir begrafniskoste, R180 000 vir emosionele skok en trauma en R1 miljoen vir grondwetlike skade.

“Dit moet binne die volgende drie maande in enkelbedrae betaal word,” het Moseneke gelas. Hy het die regering ook opdrag gegee om binne 30 dae berading aan die families wat geraak word te verskaf.

Moseneke het verder opdrag gegee dat ʼn monument opgerig word wat vir komende geslagte sal dien as ʼn herinnering aan die menswaardigheid en kwesbaarheid van mense met geestesongesondheid.

Moseneke het in sy uitspraak gesê die redes wat deur beamptes van die provinsiale departement van gesondheid gegee is oor hoekom die Life Esidemeni-kontrak beëindig is, was nie duidelik nie. Hy het gesê Qedani Mahlangu, voormalige LUR van gesondheid, het waarskuwings hieroor geïgnoreer.

“Haar optrede was irrasioneel en roekeloos. Sy het opgetree asof sy nie gestraf kan word nie aangesien die pasiënte en hul families nie die nodige hulpbronne het nie. Haar versteekte motief is steeds nie duidelik nie.”

Moseneke het gesê hy het bevind die staat het ongrondwetlik opgetree deur die irrasionele besluit te implementeer om die Life Esidimeni-kontrak te beëindig.

Hy het die NRO’s waarna pasiënte oorgeplaas is as “persele van dood en marteling” beskryf.

Meer as 140 pasiënte is dood nadat hulle na dié NRO’s oorgeplaas is. Meeste van hulle is dood weens wanvoeding en verwaarlosing.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Daan Erasmus

Wat gebeur het is hartseer en baie onnodig. Die skuldiges moet boet.
Maar dit is nie “die regering” wat gaan betaal nie. Dit is die belasting betaler. Hoe hartseer dit is, dit is nie ‘n broodwinner wat dood is nie. Geen rede dat mense moet ryk word uit die nie.

Oosie

Dankie U Edele. Die Staat kan sy straf betaal met onskuldige belastingbetalers se geld, maar wat se straf kry die skuldiges? (As iemand gestraf word vir een of ander finansiele skema wat skeef geloop het gaan hy/sy lank tronk toe – hier is mense doodgemartel)…

Hanna

Wonder hoeveel van hierdie “familie” enigsins die moeite gedoen het om vir hul naasbestaandes in die inrigtings te gaan kuier? In die twee staatshospitale vir verstandelik gestremdes waar ek gewerk het, het bitter min v ons pasiente OOIT besoekers gekry! Selfs vir solank as 8 jaar by sommiges… En nou word die families ryk agv hierdie tragedie? Ek sidder.

Johanna Botha

En wat gebeur met die mense wat skuldig is ?

Muffin

Daan ek stem 100% met jou saam. Dit was nie die broodwinner nie en hoekom moet die families verruik word.