Minister moet ingryp by Jhb-kragkrisis, sê DA

(Argieffoto: Severin D./Unsplash)

Die Demokratiese Alliansie doen ʼn beroep op die nasionale regering om die stand van die elektrisiteitsituasie in Stad Johannesburg te ondersoek, aangesien beurtkrag deur Eskom ernstige skade berokken aan die stad se elektrisiteitsnetwerk.

Cilliers Brink, die DA se skaduminister van samewerkende regering en tradisionele sake, sê alhoewel geen kragnetwerk gebou is om heeltemal die impak van beurtkrag te weerstaan nie, het die brose stand van Johannesburg se netwerk spesiale aandag nodig.

“Johannesburg is nog steeds die ekonomiese hartklop van die land en langdurige kragonderbrekings en die moontlike ineenstorting van die stad se elektrisiteitsnetwerk hou ʼn risiko in vir die hele land.”

Brink sê duisende huishoudings in Johannesburg het die afgelope twee weke kragonderbrekings beleef – bo en behalwe Eskom se beurtkragskedule. “Die probleem is tweeledig. Johannesburg se netwerk is broos en word nie behoorlik in stand gehou nie. Die slytasie weens beurtkrag lei tot sterk stygings, kortsluitings en kabelfoute. Tweedens, sodra Eskom se beurtkrag in werking tree, slaan kabeldiewe toe. Die gevolglike herstelwerk wat gedoen moet word, lei ook daartoe dat begrotings uitgeput word.”

Alhoewel personeel van City Power onverpoosd aan die kragonderbrekings werk, is dit nie duidelik of die burgemeester van Johannesburg die situasie goed kan bestuur nie, het hy bygevoeg.

“Die burgemeester of betrokke burgemeesterskomiteelid het nog nie enige duidelike plan van aksie aan wyksraadslede in Johannesburg gekommunikeer nie. En tog is dit dié raadslede wat te doen kry met geïrriteerde en desperate inwoners.”

Die DA het Vrydag die minister van samewerkende regering en tradisionele sake, dr. Nkosazana Dlamini-Zuma, skriftelik versoek om seker te maak dat alle belanghebbendes, insluitend die munisipaliteit, Eskom en die Suid-Afrikaanse Polisiediens, die situasie dophou en bestuur.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Kokerboom

Die ANC pandemie het en rig nogsteeds skade aan die land en ekonomie van onberekenbare omvang!!
Ten spyte hiervan klou die boewe soos nete en toon GEEN berou en het geen gewete!Wat het ons gedoen om die vloek te verdien?????

Persheks Adri

Gaan ry gerus deur Johannesburg en gaan kyk hoeveel onwettige verbindings daar is dit lyk soos spaghetti stringe. Raak ontslae van die townships se onwettige verbindings en ons sal baie krag hê. Reg agter Westgate ook jy’s te bang om daar te ry. Oor die pad en bo oor jou voertuig…

Werner

Hoekom net JHB.Wat van die res vd land

JohanR

Die minister slaap…..moet nie nou pla nie!

Anton

Hoekom vra hulle die onbeholpe wat dit veroorsaak het om dit op te los?