’n Man, vermoedelik in sy dertigs, is kritiek beseer toe hy Maandagoggend deur ’n bakkie raakgery en onder ’n vragmotor gesleep is.
Russel Meiring, woordvoerder van ER24, het gesê die voorval het in Albertina Sisulu-rylaan in Witpoortjie in Roodepoort plaasgevind. Dit is onbekend hoe ver die man gesleep is.
Paramedici is omstreeks 10:30 na die toneel ontbied en het die man langs die vragmotor aangetref. “Paramedici het die man ondersoek en gevind hy het erge wonde aan sy bene en rug opgedoen. Hy was in ’n kritieke toestand,” het Meiring gesê.
Die man is na die Laratong- provinsiale hospitaal gehaas vir mediese behandeling.
Die bestuurders van die bakkie en die vragmotor is nie tydens die voorval beseer nie.
Die polisie ondersoek die saak.
Was die spasie tussen die bakkie en vragmotor dalk net bietjies té klein om deur te glip? Vra maar net . . .