Nóg ʼn ANC-kader aan die hoof van die SVA

Thembisile Majola (Foto: GCIS)

Pres. Cyril Ramaphosa se aanstelling van Thembisile Majola, voormalige adjunkminister van energie, as die eerste permanente direkteur-generaal van die Staatsveiligheidsagentskap (SVA), word beskryf as ʼn politieke slenter, gebaseer op die Jacob Zuma-era van ANC-politiek.

Dianne Kohler Barnard, die DA se skaduminister van staatsveiligheid, sê die president het met dié aanstelling heeltemal die bevindings van die hoëvlak-hersieningspaneel van die SVA geïgnoreer. Dié paneel het bepaal daar is al minstens die afgelope dekade ʼn “ernstige verpolitisering en faksionalisering van die intelligensiegemeenskap”, gebaseer op faksies in die regerende party.

Dit het gelei tot ʼn algehele minagting van die Grondwet, beleide, wetgewing en ander voorskrifte. Volgens die paneel is die siviele intelligensiegemeenskap verander in ʼn privaat hulpbron om die politieke en persoonlike belange van spesifieke individue te dien.

“Trouens, dit lyk of Majola se geskiedenis in die ANC, terwyl sy in ballingskap was, ʼn beduidende rol gespeel het in haar aanstelling. Dit is nie goeie nuus vir die agentskap nie. Met Majola aan bewind, sal dit die SVA skynbaar vry staan om voort te gaan met sy spioenasiespeletjies wat slegs ten doel het om tot voordeel te strek vir die president se herverkiesingsveldtog later vanjaar.

“Suid-Afrika het ʼn desperate behoefte aan intelligensie om ons leiers te help om wyse besluite te neem – plaaslik en internasionaal. Besadigde, feite-gebaseerde besluitneming is iets wat al dekades lank tekort skiet. Die verslag oor die geweld in KwaZulu-Natal en Gauteng ná oudpres. Jacob Zuma se inhegtenisneming verlede jaar, het bevind daar was verskeie leemtes in intelligensie. Dit kan nie só voortgaan nie.”

Kohler Barnard sê dit is onverklaarbaar hoe die president net nóg ʼn kader aangestel het in die amp.

“Ons glo die direkteur-generaal van die SVA moet nie ʼn kader wees wat net sekere faksies in die ANC dien nie. Die amp moet gevul word deur ʼn persoon wat ʼn loopbaan gevolg het in die intelligensiegemeenskap. Iemand sonder politieke verbintenisse, wat die belange van die land en sy burgers bó die belange van ʼn selfsugtige ANC sal plaas. Ons land moet eerste kom, nie die ANC nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
AW

Ja Nee !!!!

Elizabeth

Ek is nie altyd seker Cyril het al sy varkies op hok nie. Wie en wat dryf hom? Hy verloor net respek.

Nie Verbaas

Nog n eerste prys vir Ramaphosa in die nar van die Jaar kompetisie.

Hennie

Kan sommer sien sy kan nie wag om ‘n boggerop te maak van haar joppie nie! Diefstal in aanvang!

Ettienne

Wanneer ‘n president veg om politieke oorlewing gaan hy nie die land eerste stel nie.