Nog twee mense is Dinsdag in hegtenis geneem in verband met die moord op ʼn Tshwane-metropolisiebeampte verlede maand.
Konst. Mike Mtsweni is op 2 Oktober gekaap, vermoor en beroof. Hy was nie ten tyde van die voorval aan diens nie. Twee verdagtes wat in besit van sy gesteelde vuurwapen was, is kort ná sy moord in hegtenis geneem.
Grandi Theunissen, burgemeesterskomiteelid vir gemeenskapsveiligheid, het die jongste inhegtenisnemings bevestig en verwelkom.
“Volgens beskikbare inligting is die twee verdagtes deur die Johannesburgse metropolisie se geheime reaksie-eenheid en die SAPD se misdaadintelligensie-eenheid in Olievenhoutbosch [ʼn informele nedersetting langs Centurion] in hegtenis geneem.
“Een van die verdagtes word ook daarvan verdink dat hy ʼn OTM-bomaanvalmeesterbrein is, terwyl die ander verdagte inligting aan amptenare verskaf het oor waar hulle die vuurwapen kan vind wat glo gebruik is om kost. Mtsweni mee te vermoor. Dit is veilig om te sê dat hierdie twee verdagtes waarskynlik gevaarlike misdadigers is, en dat hul inhegtenisnemings deur almal verwelkom moet word,” het Theunissen gesê.
Hy het die Johannesburgse metropolisie en die SAPD vir hul werk bedank om die verdagtes vas te trek.
“Om voor die hand liggende redes is my eie sentimente en dié binne die Tshwane-metropolisie sterk in hierdie geval, aangesien die bewerings teen hierdie individue met die moord op een van ons eie [mense] betrekking het.
“Ek wil ’n beroep op die SAPD en die Nasionale Vervolgingsgesag doen om ’n sterk saak teen die verdagtes te bou. Indien hulle skuldig bevind word, wil ons hê die howe moet streng optree.”
Die howe en polisie n grap.
Kom ons kyk of hulle oor 28 jaar parool kan kry