Foto ter illustrasie. (Foto: Leo Moko / Unsplash)
’n 43-jarige polisiesersant van Makhanda (Grahamstad) in die Oos-Kaap is Saterdagoggend wreed aangeval toe sy haar polisiekwartiere verlaat het om vir diens aan te meld. Die voorval het omstreeks 05:40 plaasgevind.
Volgens kol. Priscilla Naidu, polisiewoordvoerder, is die vrou vermoedelik deur haar gewese kêrel oorrompel en met ’n hamer aangeval.
“Sy is herhaaldelik teen die kop en op haar hande geslaan. Terwyl sy probeer het om na haar kamer terug te hardloop, het die verdagte haar vuurwapen gegryp en op haar geskiet. Hy het met die vuurwapen gevlug,” het Naidu gesê.
“Die ernstig beseerde sersant is in die hospitaal opgeneem. Dit is later bevestig dat sy nie skietwonde opgedoen het nie.”
Die polisie het ’n soektog na die verdagte van stapel gestuur en hom later dood in Orgleystraat in Makhanda aangetref. Hy het homself na bewering geskiet.
’n Geregtelike doodsondersoek sal gedoen word.
Die polisie ondersoek ook sake van poging tot moord, die aanval op ’n polisiebeampte en diefstal.
In ’n afsonderlike voorval Vrydag is ’n Oos-Kaapse polisiesersant vermoor.
Sers. Vuyolethu Madala (39) het ’n plaaslike taverne by die KwaNtsila-nedersetting in Tombo, Port St. Johns, besoek toe die voorval plaasgevind het. Hy was nie tydens die voorval aan diens nie.
Volgens Naidu is Madala oorval toe hy die kroeg verlaat het. Twee mans het hom na buite gevolg en van agteraf doodgeskiet.
Die verdagtes het in ’n wit bakkie sonder nommerplate gevlug en is steeds soek. Die fabrikaat van die bakkie is onbekend.
“Hy is inderhaas na ’n nabye kliniek geneem, maar het met sy aankoms aan sy beserings beswyk.”
Die polisie ondersoek ’n saak van moord. Die motief is nie bekend nie.
Genl.maj. Zithulele Dladla, waarnemende polisiekommissaris in dié provinsie, sê sulke wrede aanvalle op polisiebeamptes mag nie geduld word nie.
“Ons gedagtes en gebede gaan uit aan die families van albei slagoffers en ons wens ons beseerde kollega ’n spoedige herstel toe.
“Ons doen ’n beroep op almal op alle vlakke van die samelewing om saam met die polisie te staan om hierdie genadelose aanvalle te stop. Die groot aantal gevalle van geslagsgebaseerde geweld in ons gemeenskappe, insluitend ons organisasie, is ’n duidelike oproep dat almal moet saamstaan om te verseker dat die mees kwesbares nie misbruik word nie.”
