Pa, seun (14) in aanhouding ná dood van inbreker

Argieffoto: Kent Williamson

Argieffoto: Kent Williamson

ʼn Pa en sy 14-jarige seun van KwaMhlanga in Mpumalanga is in aanhouding nadat hulle glo ʼn inbreker Vrydagaand met messe doodgesteek het.

Volgens ʼn polisieverklaring het die 14-jarige seun wakker geword van ʼn geraas wat geklink het soos iemand wat ʼn deur probeer oopdwing.

Die seun het dadelik opgestaan en sy pa gaan wakker maak, maar toe sy pa in die voorhuis kom om ondersoek in te stel, het hy hom trompop in die inbreker vasgeloop.

Volgens die polisie het die inbreker ʼn wapen op die man gerig voordat hy op geld en ander goedere aangedring het. Die inbreker het glo verskeie skote afgevuur, maar dit is nie seker of die man gewond is nie.

Die seun se pa het vermoedelik aan die rower gesê die geld word in die kluis in die slaapkamer gehou, en het hy die pistool by hom probeer afneem op pad na die slaapkamer. ʼn Struweling het ontstaan.

Die pa het om hulp geskree en die seun het sy pa met messe te hulp gesnel.

Die pa sowel as die seun het die rower glo met messe bygedam. Die rower is op die toneel dood.

Die polisie het beslag gelê op ʼn pistool met patrone, asook die messe waarmee die rower doodgemaak is.

ʼn Saak van moord en huisroof word ondersoek. Die seun se pa het ook ʼn saak van besit van ʼn ongelisensieerde wapen teen hom.

Brig. Leonard Hlathi, woordvoerder van die Valke, was nie onmiddellik beskikbaar vir kommentaar nie. Dit is nie duidelik of iemand anders in die huis was ten tye van die voorval nie.

Dit is ook nog nie duidelik of enigiemand aangekla is nie. Die pa en seun sal na verwagting binnekort vrygelaat word ná volledige ondervraging.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

79 Kommentare

jongste oudste gewildste
Jaco

Kom ons almal word kriminele dan is ons ten minste imuun teen die reg en weet ons, ons kan nie vervolg word nie.

Cecilia Steyn

Só tipies! Die inbreker kom onwettig, ongenooid en boonop gewapen in die mense se huis in en nou’s húlle die varke in die verhaal!

suzettw

Op die ou end van die dag gaan die pa en seum sit vir moord. Want die skurk is mos nou dood. Dit maak mos nie meer saak of jy vir jou eie veiligheid opstaan nie.

Brie- brie

Hoe moet jy jouself verdedig en jou familie. Die persoon was reeds in die huis. Daar is iets agter hierdie storie.

Sw

Is dit n prioriteitsmisdaad dat die Valke dit moet ondersoek? Regtig belaglik!
Dis omdat die krimineel meer regte het, dat die land in sy maai is.