Die Gautengse onderwysdepartement sal van volgende Maandag begin met die plasing van leerders vir gr. 1 en gr. 8. Die proses sal dan tot die einde van die jaar voortduur en alle leerders geplaas is.
Die LUR vir onderwys in Gauteng, Matome Chiloane, het Sondag gesê altesame 757 075 aansoeke vir plasing is ontvang. Net meer as 35 000 hiervan is as onvolledig uitgewys – daar is dus geen bewys van huisadres ingehandig nie.
SMS’e sal van 4 September aan ouers gestuur word, met die LUR wat sê nie almal sal dit op dieselfde dag ontvang nie. Sou ouers nie ʼn SMS ontvang nie, kan hulle die status van ʼn aansoek steeds aanlyn by www.gdeadmissions.gov.za nagaan.
Indien ʼn SMS ontvang word dat ʼn leerder plasing by ʼn spesifieke skool gekry het, word dit as ʼn suksesvolle plasing beskou en hoef ouers nie weer op die stelsel aan te meld nie. Plasings word ingevolge spesifieke kriteria gedoen, en nie op grond van aansoeke wat eerste ontvang is nie, sê die LUR. Die kapasiteit van skole speel ook ʼn bepalende rol.
Chiloane sê aansoekers wat nie geholpe kan raak by skole waar hulle aansoek gedoen het nie – omdat daardie skole reeds kapasiteit bereik het – sal oorplasingsaanbiedinge na die volgende naaste skool met beskikbare plek ontvang.
Die oorplasingsaanbod word eers gemaak nadat al die skole waar ʼn ouer aansoek gedoen het, aangedui het dat hulle geen plek beskikbaar het nie. Ouers wat aanbiedinge kry van skole waar hulle nie aansoek gedoen het nie, kan die aanbod aanvaar of van die hand wys.
Daar is ook ʼn beswaar- en appèlproses wat gevolg kan word indien ouers ontevrede met ʼn plasing is.
Hoëdrukskole
Chiloane sê sowat 292 laerskole en 277 hoërskole in die provinsie is as sogenaamde hoëdrukskole geïdentifiseer; dit is skole wat ʼn “oorweldigende” getal aansoeke ontvang het en dus veel meer as die kapasiteit wat dit kan hanteer.
Laerskole met grootste getal aansoeke | ||||
Skoolnaam | Distrik | Kapasiteit | Aansoeke | |
1. | Laerskool Akasia | Tshwane-Wes | 246 | 1 476 |
2. | Palmridge Primary School | Ekurhuleni-Suid | 200 | 1 102 |
3. | Laerskool Rachel de Beer | Tshwane-Wes | 240 | 1 085 |
4. | Alston Primary School | Ekurhuleni-Suid | 240 | 1 016 |
5. | Stoneridge Primary School | Ekurhuleni-Suid | 250 | 1 000 |
6. | Lakeside Primary School | Ekurhuleni-Suid | 160 | 999 |
7. | Laerskool Theresapark | Tshwane-Wes | 230 | 984 |
8. | Selcourt Primary School | Gauteng-Oos | 120 | 935 |
9. | Opelweg Primary School | Ekurhuleni-Suid | 275 | 926 |
10. | Alberview Primary School | Ekurhuleni-Suid- | 150 | 924 |
11. | Kenton Primary School | Ekurhuleni-Suid | 130 | 866 |
12. | Hamilton Primary School | Tshwane-Suid | 70 | 864 |
13. | Laerskool Meyerspark | Tshwane-Suid | 150 | 862 |
14. | Midrand English Medium Primary School | Johannesburg-Oos | 196 | 857 |
15. | Brackenhurst Primary School | Ekurhuleni-Suid | 200 | 856 |
16. | Laerskool Westgold Primary School | Gauteng-Wes | 177 | 854 |
17. | Norkem Park Primary School | Ekurhuleni-Noord | 180 | 851 |
18. | Alpha Primary School | Johannesburg-Sentraal | 115 | 848 |
19. | Nellmapius Ext.1 Primary School | Tshwane-Suid | 200 | 829 |
20. | Edenpark Primary School | Ekurhuleni-Suid | 164 | 827 |
Hoërskole met grootste getal aansoeke | ||||
Skoolnaam | Distrik | Kapasiteit | Aansoeke | |
1. | Kathlehong School of Specialisation | Ekurhuleni-Suid | 275 | 2 641 |
2. | Hoërskool Langenhoven | Tshwane-Wes | 290 | 2 617 |
3. | Alberton High School | Ekurhuleni-Suid | 200 | 2 500 |
4. | Parktown Boys’ High School | Johannesburg-Oos | 197 | 2 318 |
5. | Boksburg High School | Ekurhuleni-Suid | 254 | 2 179 |
6. | Hoërskool President | Johannesburg-Sentraal | 450 | 2 149 |
7. | Sir John Adamson High School | Johannesburg-Sentraal | 480 | 2 069 |
8. | Hoërskool Akasia | Tshwane-Wes | 230 | 2 041 |
9. | Phumlani Secondary School | Ekurhuleni-Suid | 250 | 1 996 |
10. | Sunward Park High School | Ekurhuleni-Suid | 320 | 1 970 |
11. | Jeppe High School for Boys | Johannesburg-Oos | 220 | 1 968 |
12. | Northcliff High School | Johannesburg-Noord | 280 | 1 941 |
13. | Mondeor High School | Johannesburg-Sentraal | 338 | 1 939 |
14. | Kathlehong Secondary School | Ekurhuleni-Suid | 300 | 1 896 |
15. | Hoërskool Gerrit Maritz | Tshwane-Wes | 236 | 1 834 |
16. | Hoërskool Elspark | Ekurhuleni-Suid | 260 | 1 828 |
17. | Lesiba Secondary School | Ekurhuleni-Noord | 400 | 1 794 |
18. | Hoërskool Birchleigh | Ekurhuleni-Noord | 300 | 1 783 |
19. | Hoërskool Jeugland | Ekurhuleni-Noord | 300 | 1 763 |
20. | Rand Park High School | Johannesburg-Noord | 315 | 1 738 |
Die LUR sê bepaalde ingrypings is reeds ingestel om uitdagings met skoolplasings te pak. Dit sluit in die lewering van basiese dienste aan alle skole, die bou van nuwe skole en die vervanging van bestaande skole, die verkryging van mobiele klaskamers en die hergebruik van fasiliteite in gebiede waar groot druk ondervind word.
“As verdere ingryping om druk weens migrasie na die provinsie en die gevolglike tekort aan onderrig- en leerruimtes te verlig, het die bestuur van die departement ʼn model vir satellietskole van stapel gestuur. Dit behels dat vakante grond in drukgebiede bekom en geld na ʼn nabygeleë en goed funksionerende skool gekanaliseer word om ʼn satellietskool te bou en te bestuur.”
Verskeie skole is ook in aanbou.
Hulle is vinnig oppad terug na die dae wat kinders onder bome skoolgegaan het
Bou meer skole, al oplossing veral in townships.
Daai skole sê vir jou waar jy nie moet woon nie.