‘Rasse-aanval’: Man kry 22 jaar tronkstraf

Harry Kotze tydens ’n hofverskyning in 2017. Skermskoot: SAUK-video

ʼn Man (38) van Kathu in die Noord-Kaap is 22 jaar tronkstraf opgelê vir moord en poging tot moord nadat hy vier mans met sy bakkie gestamp het, waarna een aan sy beserings beswyk het.

Waarnemende landdros Vernon Smith het Harry Kotze op sy tuisdorp 20 jaar tronkstraf opgelê vir die moord op Elcardo Crew (20), sewe jaar vir poging tot moord op Eshric Molino (ook 20) en vir poging tot moord op Liam Cloete en Convin Jager vyf jaar elk.

Die landdros het gelas Kotze moet die drie vonnisse vir poging tot moord gelyktydig uitdien, wat neerkom op 22 jaar effektiewe tronkstraf.

In die hof is getuig Crew en die drie oorlewendes het op die aand van Vrydag 13 Oktober by ʼn huis verbygestap waar Kotze en sy vriende party gehou het, sê Phaladi Shuping, streekswoordvoerder van die direktoraat van openbare vervolging.

Die twee groepe het in ʼn woordewisseling betrokke geraak. “Kotze het die vier mans met sy bakkie agternagesit en hulle gestamp,” sê Shuping. Tydens sy verhoor het ʼn polisiebeampte getuig die motief vir die aanval was glo rasgedrewe.

“Crew is ernstig beseer en het met sy aankoms by die hospitaal gesterf. Molino se bekkenbeen is gebreek en Cloete en Jager is gering beseer.”

Kotze se verweer was niepatologiese onbevoegdheid omdat hy drank en dwelms gebruik het, maar die staatsadvokaat, Ndimphiwe Mxabo, het gevra die hof moet die beskuldigde se weergawe verwerp omdat hy die slagoffers geruime tyd gejaag het in ʼn gebied waar baie bome staan, sonder dat hy een getref het.

Die beskuldigde kon die bakkie in elke rigting stuur waarin die slagoffers gehardloop het.

“Die beskuldigde kon die bakkie in elke rigting stuur waarin die slagoffers gehardloop het,” het Mxabo gesê, “wat daarop dui dat hy by sy volle bewussyn was.”

Kotze moes bewus gewees het van sy misdadige optrede, het die staat aangevoer, want hy het ʼn hakie van een van die bakkie se kolligte verwyder en dit in sy huis weggesteek. Die ondersoekbeampte het daarop afgekom toe Kotze se huis deursoek is.

In sy slotbetoog het Mxabo aangevoer die beskuldige se voertuig is gebruik om die misdaad te pleeg, die beskuldigde het dit bestuur, hy was toerekeningsvatbaar en het beplan om sy bakkie as ʼn moordwapen te gebruik.

Mxabo het gevra die hof moet Kotze se getuienis en verweer van geheueverlies wat tot patologiese onbevoegdheid gelei het, verwerp aangesien hy bewus was van sy dade.

Smith was daarvan oortuig die staat het sy saak bo enige redelike twyfel bewys.

Abrie Botha, waarnemende direkteur van openbare vervolging in die Noord-Kaap, het die werk van die ondersoekbeampte, ao. Benjamin Fourie, en Mxabo geloof vir hul harde werk wat verseker het dat geregtigheid vir die slagoffer en oorlewendes geskied het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
D B

Onthou nie die saak nie, maar ek verstaan nie hoe jy 1 mens doodry en 3 ander raakry as hulle in verskillende rigtings in hardloop nie soos Mxabo beweer nie?

Estie

Abrie Botha, waarnemende direkteur van openbare vervolging, en ao. Abrie Botha, ondersoekbeampte? Kan sekerlik nie reg wees nie, of is dit toeval dat hulle dieselfde name en vanne het?

christa

geen simpatie. As hy gesuip was moet hy eintlik ‘n swaarder straf gekry het. Almal wil altyd agter drank skuil. As jy gesuip is soek jy gewoonlik moeilikheid, dus sal ek glo hy het onskuldige mense gejag.

Landi

Verbasend min kommentare. Wanneer skreeu mense dan oor die onreg ? Teen die pleger van die wandaad, of teen die slagoffers? Niks? Iemand?

jaco

Dit kom nou van drank en dwelms. Net vreemd dat dieselfde wit mense wat sulke rasgedrewe misdade pleeg en wat so baie kla oor die einste ras wat nou SA regeer, ook maar lekker voordeel trek uit maatreëls wat dagga semi-wettig gemaak het en dan ook ander dwelms gebruik, juis weens swak polisiëring teen dit…