Twee renosterstropers is Donderdag in die Zeerust-landdroshof in Noordwes tot 12 jaar direkte tronkstraf gevonnis.
Lt.kol. Amanda Funani, polisiewoordvoerder, het Saterdag in ʼn verklaring gesê dat Alfredo Sitoe (43) en Thomas Mlambo (46) elk ʼn vonnis van 44 jaar vir renosterstropery, die onwettige besit van vier renosterhorings, betreding en die besit van ʼn ongelisensieerde vuurwapen ontvang het. Dié vonnisse sal egter gelyklopend uitgedien word.
Sitoe en Mlambo is op 20 Oktober verlede jaar saam met drie ander verdagtes in Nietverdiend buite Zeerust in hegtenis geneem. Hulle was in ʼn minibus-taxi toe die polisie hulle aangekeer het.
Die renosterhorings in hul besit was in foelie toegedraai en in swart plastieksakke versteek. Die polisie het ook ʼn byl, mes, ammunisie en ʼn knaldemper in hul besit gevind.
Een van die vyf verdagtes het ontsnap voordat die polisie hom in aanhouding kon plaas, terwyl nog ʼn verdagte, Thomas Chauke, kort voor die hofverskyning in November verlede ontsnap het.
Hulle word steeds deur die polisie gesoek.
Die ander persoon wat saam met Sitoe en Mlambo op die aanklagte tereggestaan het, is intussen vrygespreek.