SA bank derde beste bank ter wêreld

Capitec Bank is wel nie een van Suid-Afrika se topvier banke nie, maar dis die derde beste bank ter wêreld.

Capitec Bank het stof in die oë van Suid-Afrika se Groot Vier geskop deur aangewys te word as die beste bank in Suid-Afrika sowel as Afrika en die derde beste bank ter wêreld.

Die Lafferty-bankranglys 2018 het vyf sterre toegeken aan net agt van die 500 banke op sy lys van die beste instellings ter wêreld. Pole blink uit met twee banke in die top-agt, en Australië word uitgesonder as die land met die heel swakste banke uit die 72 lande in die ondersoek.

Vanjaar was dit die eerste keer dat Lafferty na 500 banke gekyk het, vyf keer soveel soos in 2016 en 2017. Die meeste banke (264) het drie sterre gekry, waaronder Suid-Afrika se Investec, Nedbank en Standard Bank. Absa, Finbond en FirstRand (FNB) is van die 166 banke wêreldwyd waaraan vier sterre toegeken is.

Suid-Afrika se banksektor het goed gevaar, met ʼn gemiddelde gradering van 3,7 sterre, beter as die Verenigde Koninkryk (3,5), Switserland (3,4), Swede (3,6), Katar (3,6) en Israel (3,5), maar swakker as Kenia (3,9), Oman (4), Pole (4,1) en Rusland (3,8).

Duitsland (2,8) en Amerika (2,7) se banke het glad nie waffers gevaar nie.

Lafferty het Capitec Bank in 2016 en 2017 as die beste bank ter wêreld aangewys. FinBond (11), FirstRand (15) en Absa (71) is vanjaar ook onder die beste 100 banke in die wêreld, maar Nedbank (196) en Standard Bank (337) het met net drie sterre elk heelwat swakker gedoen.

Van die aspekte wat beoordeel word, is ʼn bank se kultuur, hoe tevrede sy kliënte is, hoe getrou beloftes nagekom word en die bank se finansiële resultate.

Gerrie Fourie, Capitec Bank se uitvoerende hoof, het aan Business Report gesê: “Ons glo banksake moet eenvoudig, bekostigbaar en deursigtig wees en terwyl ons daarna streef om die beste handelsbank ter wêreld te wees, is dié erkenning ʼn sterk aanduiding dat ons op pad is in die regte rigting.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Eish

Uitstekende prestasie!
Die bank is lus vir besigheid!

Tina du Toit

Ek is baie tevrede met Capitec se dienste en spaar baie onkostes.

petro

Die nuus berig en die byskrif by Capitec embleem weerskpreek mekaar

Stem saam

Dis die eerste bank waar my rente aansienlik meer is as my bankkoste. En ek was al by 2 van RSA se 4 groot banke. Capitec is regtig die beste en mens kry top diens

WIEBO

Capitec is die beste. Lae kostes, geen verskuilde kostes, geen rye om te wag nie en vriendelike personeel.