Skietery by Kaapstad-winkelsentrum

Argieffoto

Argieffoto

Een man is Vrydag dood en twee beseer tydens ʼn skietvoorval by ʼn winkelsentrum in Ottery in Kaapstad.

Kapt. FC van Wyk, woordvoerder van die polisie, het Saterdagoggend aan Maroela Media bevestig die skietery het omstreeks 17:20 plaasgevind.

Werner Vermaak, woordvoerder van ER24, het in ʼn verklaring gesê paramedici en metro-nooddienste is na die toneel naby Sandfonteinweg ontbied. Een van die mans is noodlottig beseer en hy is op die toneel dood verklaar. “ʼn Tweede persoon was in ʼn kritieke toestand en ʼn derde persoon in ʼn ernstige, maar stabiele toestand,” het Vermaak bygevoeg. Hulle is albei op die toneel behandel en later na ʼn nabygeleë hospitaal geneem.

Die oorsaak van die skietery is nog nie bekend nie. “Die polisie ondersoek ʼn saak van moord en poging tot moord,” het Van Wyk bygevoeg. “Niemand is nog in verband met die voorval in hegtenis geneem nie.”

Enigiemand met inligting oor die voorval word versoek om Crime Stop te skakel by 08600 10111.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae