(Argieffoto: Hans Braxmeier/pixabay)
ʼn 59-jarige verdagte, vermoedelik die hoof van ʼn plaaslike skool in Ntabankulu in die Oos-Kaap, is Vrydag in hegtenis geneem.
“Die inhegtenisneming volg ná klagtes deur die skoliere, die gemeenskap en ander belanghebbendes dat ʼn 21-jarige skolier deur ʼn ouer persoon in die skool verkrag is,” sê brig. Tembinkosi Kinana, woordvoerder van die polisie. Ntabankulu is sowat 50 km oos van Mount Frere.
“Volgens die berig het dit ʼn paar keer gebeur, maar dit is nie dadelik by die SAPD aangemeld nie, totdat skoliere teen die skoolowerhede uitgevaar het. Die omstandighede rondom die voorval word deur die polisie se eenheid teen gesinsgeweld, kinderbeskerming en seksuele oortredings ondersoek.”
ʼn Saak van verkragting is aanhangig gemaak en die verdagte is binne 24 uur in hegtenis geneem. Hy sal na verwagting Maandag in die Ntabankulu-landdroshof verskyn.
