‘Swart regering wettig armoede’ – Saftu-staking in NM-baai

Saftu-optog in Port Elizabeth (25 April 2018) Foto: Raahil Sain/ANA

Duisende werkers het Woensdag die strate van Port Elizabeth ingevaar onder die vakbondfederasie Saftu se banier as deel van ʼn landswye staking om teen die voorgestelde minimumloon van R20 per uur of R3 500 per maand te betoog.

Die R20-minimumloon sou op 1 Mei in werking getree het, maar is intussen uitgestel weens parlementêre prosesse.

Die betoging het buite die Eeufeessaal in New Brighton begin en werkers het nagenoeg drie ure lank aan die optog deelgeneem tot hulle die Nelson Mandelabaai-stadsaal bereik het.

Lede van die Ekonomiese Vryheidsvegters (EFF) het ook by die betoging aangesluit, en ʼn swaar polisieteenwoordigheid het oor die skare gewaak. Winkeleienaars het hul deure gesluit as ʼn voorsorgmaatreël.

Andrew Chirwa, president van die vakbond Numsa, het die skare toegespreek en gesê die regering het ʼn aanval geloods teen werkers en dink hulle is net R20 per uur werd. “Die nuwe môre is R20 per uur, die nuwe môre is 15% BTW, die nuwe môre is dat die reg om te staak weggeneem sal word. Diegene wat verward is oor Desember, daar is nie ʼn nuwe môre nie. Dis dieselfde wyn in ʼn ander verpakking,” het Chirwa gesê.

Hy het ook die “swart regering” veroordeel wat glo armoede wettig. “De Klerk en Botha het dit nooit gedoen nie, maar ons eie swart regering het besluit om armoede te wettig. Hulle verstaan nie die pyn nie. Hulle weet nie dat jy niks met R20 kan doen nie. Hulle ignoreer doelbewus die apartheidsloongaping dat wit mense meer verdien as swart mense.”

Chirwa het gesê mense wat “in hul rykdom swem” is diegene wat besluit het dat R20 per uur voldoende is vir werkers.

Gordon Maseko, nasionale tesourier van die vakbond Salipswu, ʼn filiaal van Saftu, het gesê die nuwe minimumloon is problematies vir werkers, as mens inflasie in ag neem.

ʼn Memorandum van eise is aan ʼn verteenwoordiger van die departement van arbeid oorhandig.

Saftu het protesoptogte in Johannesburg, Polokwane, Bloemfontein, Durban, Oos-Londen en Kaapstad gereël, maar gesê optogte kan ook moontlik op ander plekke voorkom.

Die Johannesburgse middestad is tot ʼn stilstand gedwing. Zwelinzima Vavi, algemene sekretaris van Saftu, het gesê die vakbondfederasie het aansoek gedoen vir ʼn permit van 7 500 betogers, maar die geraamde getal is baie meer as wat hulle verwag het. “Dit is iets wat baie lank laas in Suid-Afrika gesien is; ons is baie tevrede,” het Vavi gesê. “Die busstaking het ons in sommige gebiede geraak, maar ons bedank almal wat hul motors beskikbaar gestel het om dié nasionale staking moontlik te maak.”

Die skare het liedere teen pres. Cyril Ramaphosa gesing en plakkate omhoog gehou wat met die staatspresident spot.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

19
Nou pra' jý

Jy moet deel van Maroela-fontein wees om kommentaar te lewer.

of word deel

18 Kommentators

19 Kommentare

jongste oudste gewildste
Gerrit

Ook met niks tevrede nie die glas is altyd half leeg nooit half vol nie

Jannieman

Hierdie is deja vu vir my.

Ek het in die negintags vir n semi-staats instelling gewerk en ons was lam gele met hierdie selfde eise. Ons het vir die werkers en unie verteenwoordigers probeer verduidelik dat hulle hulself uit n job uitwerk maar hulle het vir ons gelag.

Hulle sit almal sonder werk vandag en ons gedy as interpreneurs. En dan blameer hulle wragtag blankes. Dis om van te huil.

Janneman

En hoe dink SAFTU voel die miljoene werkloses wat R0/uur verdien. Hullle eise word nie verbind met produksie verhoging or dergelike voorstelle om dit te finansieer nie.

CR het n onmoontlikke taak. Ek glo hy weet wat gedoen moet word om die ekonomie aan die gang te kry maar omdat hy n soveel dooie hout en korrupte kaders in sy kabinet het is sy hande geboei.

Loon

Betoog maar…..niks vir niks en bietjie vir n tiekie.
Mens kry nie net nie…

Boerseun

As julle minder geld vir die unies gee het julle klaar meer in jul sak