Talle ouers ervaar probleme met aanlyn skoleregistrasie

‘n Skermgreep van ‘n klagte op Twitter oor die aanlynregistrasiestelsel.

Die Skoleondersteuningsentrum (SOS) sê hy het Maandag verskeie klagtes van gefrustreerde ouers gekry wat sukkel om hulle kinders op die aanlyn registrasieplatform by die skool van hul keuse in te skryf.

Voornemende gr.1 – en gr. 8-leerders kon sedert 08:00 vanoggend by Gautengse skole inskryf vir volgende jaar. Volgens die Gautengse departement van onderwys (GDO)het skole in die provinsie plek vir 320 000 leerders. Teen vanoggend is 195 000 aansoeke al ontvang.

Melanie Buys, hoof van ontwikkeling aan die SOS, het gesê van die klagtes wat ontvang is, is dat aansoekers wat binne die voedersone van die skool woon, outomaties op die skool se vierde waglys geplaas is (terwyl hulle eintlik eerste in aanmerking behoort te kom vir ’n plek in die skool), dat sommige ouers glad nie op die stelsel kon inkom nie, of dat die platform nie hulle woonadres opgetel het nie.

Engelse ouers het onder meer gekla dat hulle slegs by Afrikaanse skole kon inskryf, hoewel sommige Engelse skole nader aan hul woonadres geleë is. In sommige gevalle wou die stelsel nie geregistreerde ouers se gebruikersnaam en wagwoord aanvaar nie en verskeie skole het gekla dat hulle glad nie op die GDO se stelsel kon inkom om aansoeke te verifieer nie.

“Lesufi probeer openbare skole kaap en wil volledig beheer uitoefen oor toelatings, terwyl die Gautengse departement van onderwys geensins die kapasiteit of reg het om dit te doen nie,” het Buys gesê.

“Skole moet nou bontstaan om die chaos te probeer uitsorteer. Ten spyte van gevorderde tegnologie tot die GDO se beskikking, was skole se eie aansoekstelsels in die verlede baie meer effektief.”

Die SOS is ook omgekrap oor Lesufi se uitlatings met betrekking tot Afrikaans as onderrigtaal tydens ’n mediakonferensie Sondag.

Lesufi het die SOS en die burgerregtegroep AfriForum gekritiseer omdat hulle gevra het dat die aanlyn registrasieplatform voorsiening maak vir aansoekers se voorkeurtaal van onderrig en leer. Die platform het ouers aanvanklik verplig om die skool die naaste aan hul woonadres aan te dui as die skool van eerste keuse, ongeag die onderrigtaal van die skool of leerder.

Die departement het verlede week aangevoer hy het sy platform aangepas om ouers ’n verskeidenheid opsies van skole naby hul woonadres te bied en het onderneem om onderrigtaal in ag te neem met plasings.

Lesufi het Sondag daarop gesinspeel dat groepe wat hulle beywer vir onderrig in Afrikaans, gekant is teen ’n nie-rassige samelewing en die vooruitgang van swart kinders.

Buys het gesê dit is nie rassisties om jou te beroep op ʼn grondwetlike reg nie.

“Internasionale studies het herhaaldelik bewys dat kinders wat in hul moedertaal onderrig word, ’n groter kans op akademiese sukses het, selfs al sou hulle tersiêre studies in ’n tweede of derde taal aanpak. Vir Lesufi om voor te gee dat Afrikaanse skole irrelevant is omdat meeste universiteite in die land verengels het, is ’n gruwelike mistasting,” het sy gesê.

Die SOS het gesê hy vra nie voorkeurbehandeling vir Afrikaans nie, maar wil sien dat al Suid-Afrika se amptelike tale uitgebou word, sodat moedertaalonderrig in dié tale verseker word. Sy sê sy glo baie van die probleme wat tans in die onderwys ervaar word, daaruit spruit dat kinders nie ten minste die eerste paar jaar van hul skoolloopbaan in hul moedertaal onderrig word nie.

SOS sê hy glo deur hom te beywer vir onderrig in Afrikaans, hy ook die weg baan vir ander taalgroepe om ook op onderrig in húlle moedertaal aan te dring.

AfriForum het óók sy teleurstelling met die aanlyn platform uitgespreek. Die organisasie sê hy het óók talle klagtes ontvang van ouers wat sukkel om die stelsel te gebruik. Talle ouers is nou bekommerd aangesien hulle slegs kon registreer om op waglys vier of vyf geplaas te word.

“Lesufi wys gou vingers na partye wat altyd probleme het met die stelsel en beskuldig hulle dat hul leuenaars is of alewig vir Afrikaans se voortbestaan wil veg. ’n Mens kan ongelukkig ook net wonder oor die suiwerheid van Lesufi se motiewe, aangesien dit lyk of die stelsel nie aangepas is met die nodige deeglikheid soos ooreengekom nie,” het Carien Bloem, AfriForum se projekkoördineerder vir onderwys, gesê.

“Ons wil ouers aanmoedig om AfriForum asseblief in kennis te stel van enige probleme wat hulle met die aansoekproses ervaar.”

Steve Mabona, woordvoerder van die Gautengse onderwysdepartement, het onderneem om kommentaar te lewer. Sy reaksie sal bygewerk word sodra Maroela Media dit ontvang.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Andreas

Dit is Lesufi se virus wat so met die stelsel se gal werk. En natuurlik sy kaders daar agter die skerms.

Thelsa

Lesufi lieg as hy sê die stelsel werk. Dis niks anders as gedwonge integrasie soos wat die VSA in die middel 70’s beleef het nie.

Andreas

Maar om die stelsel so te manipuleer, vir jare dit sy missie maak, moet Lesufi ‘n oneindige afkeer vir Afrikaans en wit mense hê. Hy gaan erger tekere as Cyril en Julius oor grond.

Massiewe gesukkel

Ek het soos Antie Stienie gevoel vanoggend: ‘Ek weet tog nie hoekom ek so moet suffer nie’…27 keer van die stelsel afgegooi. 1,5 uur later (gedeeltelikse?) sukses want wonder-bo-wonder daar verskyn ‘n waglysnommer. Neem ‘n skermskoot vir in geval. Ek wag nogsteeds vir my inkennisstelling via epos en/of sms. Ek weet ook nie hoekom ek so moet suffer nie… (*ek dink ek gaan my 1,5 se werksverlies eis van Lesufi).

Stormjaars

Die aanlyn stelsel is lesufi wat ons reg van onderig van ons af weg vat. Dit is net in een provinsie. As ek kon sou ek lesufi dagvaar hiervoor. Hy is die rassis. Hy wil weg doen met Afrikaans. lesufi kan maar vergeet ons sal teen hom en sy soort opstaan vir ons reg.