Vloedwater rig skade aan op pad na Upington

Die Vanderkloof Dam het verlede week oorgeloop en het boere laer af in die Oranjerivier baie benoud gehad Foto: Werner Smook

ʼn Benoude atmosfeer het verlede week onder die inwoners langs die Oranjerivier, tussen die  Gariepdam en Douglas, geheers.

Watervlakke het gevaarlik hoog gestyg ná swaar reën in dié rivier se opvangsgebied in Lesotho geval het. Boere langs die rivier kon egter betyds hulle pompe opskuif en minimale skade is aangerig. Gelukkig sak die watervlakke nou stelselmatig.

Die riviergemeenskappe anderkant Douglas, waar die Vaalrivier by die Oranjerivier aansluit, het egter rede tot kommer. Die Vaaldam word nou vinnig vol en staan reeds op 85,1%. Swaar reën al langs die Vaalrivier het die watervlakke van dié rivier ook aansienlik laat styg en baie vloedskade is reeds aangerig.

ʼn Wolkbreuk in die Vaalrivier se opvangs, in die gebied rondom Taung, het reeds baie vloede veroorsaak. Die N18 tussen Vryburg en Taung is gesluit weens groot gedeeltes wat onder water is en skade is aangerig aan laagwaterbrûe, waarvan die skouers begin wegspoel. ʼn Duiksloot onder die N14, 42 km buite Kuruman op pad na Vryburg, het inmekaargesak. Motoriste word herlei na sekondêre roetes wat meestal grondpaaie is. Dié paaie kan nie die swaar verkeer en vragmotors hanteer nie. Motoriste word aangeraai om hierdie gedeelte van Noordwes en die Noord-Kaap te vermy.

Bloemhofdam skep ook ʼn risiko omdat die dam nie baie meetplate het nie en onaangename verrassings kan bied as die dam nie haarfyn gemonitor word nie.

Nicol Jansen, president van Agri-Noord-Kaap, is veral bekommerd oor die inwoners agter die vloedwalle op pad na Upington, wat die staat sedert 2011 steeds nie herstel het nie.

Hy doen ʼn beroep op boere om seker te maak dat hulle twee keer per dag ʼn bywerking oor die Vaal- en Oranjerivier se vlakke vanaf hulle plaaslike waterrade kry. Hulle moet ook help om vlakke te monitor en aan te meld, veral waar riete en opdrifsels water kan laat opdam.