Onder Wellington se 10 meter hoë gehekelde Kersboom lê nie Kerspresente nie, maar iets veel kosbaarder: Dit simboliseer gemeenskap, samewerking, vriendskap en hoop. Die kleurvolle, verligte lappieskersboom pronk tans in die parkeerterrein van die NG Moedergemeente Wellington op dié Wes-Kaapse dorp en sal tot aan die begin van Januarie te sien wees.
Die boom bevat meer as 3 000 gehekelde lappies en is ʼn inisiatief wat deur die plaaslike ACVV-dienssentrum, ʼn organisasie sonder winsmotief wat maatskaplike dienste aan bejaardes en kinders lewer, van stapel gestuur is.
“Die grootste suksesverhaal van hierdie projek is dat mense uit verskillende ekonomiese omstandighede en verskillende rasgroepe almal bymekaargekom het om aan een gemeenskaplike doel te werk,” het Sorita Stoffberg, takvoorsitter, Woensdag aan Maroela Media gesê.
“In die proses is vriendskappe gesmee en ons nou so ʼn hegte groep vroue. Ek noem hulle my Gideonsbende, want hulle is net altyd beskikbaar. Dis werklik mense wat uit al die verskillende vlakke van die samelewing kom.”
Stoffberg sê hulle was oorweldig deur die aantal plaaslike organisasies – ouetehuise ook – en lede van die gemeenskap wat saamgespan het om die lappies te hekel – tot sover as in die Noord-Kaap.
Hulle het meer as 7 400 gehekelde lappies (ongeveer 15 cm by 15 cm elk) ontvang – veel meer as die 2 500 waarvoor hulle aanvanklik gehoop het. Die lappies wat nie vir die boom gebruik is nie, sal gebruik word om komberse mee te maak en in die komende winterseisoen aan behoeftiges in die gemeenskap geskenk word. Indien die lappies van die Kersboom ook nog bruikbaar is wanneer dit op 9 Januarie afgeslaan word, sal dit ook vir komberse gebruik word.
Stoffberg sê sy het die idee vir die boom in Desember verlede jaar raakgesien toe sy navorsing oor moontlike projekte vir 2022 gedoen het. Sy wou iets doen wat as ʼn goeie advertensie vir die ACVV-tak sal dien, maar ook die gemeenskap sal verenig.
“Ek het aan die begin van die jaar uitnodigings gedruk en vir mense gesê wat ons wil doen. Ons het toe nogal heelwat reaksie gekry van mense wat sê hulle wil ook by die projek betrokke raak. Almal het ingespring en gehelp.
“Kennisse en familielede van die mense hier het ook daarvan gehoor en ons het ná die Junie-vakansie selfs gehekelde lappies van die Noord-Kaap ontvang. ʼn Tannie wat ʼn knie-operasie ondergaan het en van die projek gelees het, het ook lappies uit Langebaan gestuur.”
Stoffberg sê die boom het intussen ook ʼn trekpleister in die dorp geword.
“Daar stop gereeld mense om foto’s te neem en na die boom te kyk, en ek kry nogal gereeld WhatsApp-boodskappe wat sê hulle was daar en dat hulle baie daarvan hou.
“Dit is ook nie meer net ʼn boom nie, dit gee hoop. Wanneer laas het jy gehoor dat mense so saamwerk – so dikwels hoor ons net hoe mense die heeltyd met mekaar baklei.”