Minstens 18 persone is dood en sowat 189 beseer toe ʼn tenkwa Saterdag op ʼn deurpad in die suidooste van China ontplof het.
Die ontploffing het groot skade aan nabygeleë geboue aangerig. Een foto wys hoe brandbestryders laatnag nog ʼn rits geboue met water bespuit.
Die vragmotor het vloeibare gas vervoer en omstreeks 16:45 op die Shenyan-Haikou-deurpad, suid van Sjanghai in Zheijiang, ontplof, het die amptelike Xinhua-nuusagentskap berig.
ʼn Tweede ontploffing het gevolg toe die vragmotor op ʼn fabriekwerkswinkel geval het.
Die Wenling-regeringskantoor het op sosiale media gesê huise en werkswinkels het meegegee en minstens 189 persone ontvang behandeling by ses hospitale.
ʼn Werker by ʼn nabygeleë restaurant het aan Xinhua gesê die ontploffing het die ruite van haar huis laat bars, maar haar ma en broer is ongedeerd.