Die 41 Indiese werkers wat 17 dae lank in ʼn tonnel vasgekeer was, is Dinsdag suksesvol deur reddingswerkers na veiligheid gebring.
Die mans is met draagbare op wiele deur ʼn 57 m lange staalpyp na veiligheid uitgetrek voordat hulle deur staatsamptenare begroet is en hul families kon omhels.
Daar is sedert 12 November, toe ʼn gedeelte van ʼn ondergrondse tonnel in Uttarakhand in die noorde van Indië ineengestort het, van graafmasjiene gebruik gemaak om tonne puin, grond en beton te verwyder om die werkers te bereik.
Eerste minister Narendra Modi het in ’n verklaring aan die werkers gesê dat hul “moed en geduld almal inspireer”.
“Geduld, harde werk en geloof het gewen,” het Pushkar Singh Dhami, die deelstaat se hoofminister, gesê en die onvermoeide werk van al die reddingspanne geprys.
Die werkers is volgens reddingswerkers in goeie gesondheid en ’n span medici het hulle in ’n veldhospitaal ondersoek toe hulle na veiligheid gebring is.
Ná herhaalde terugslae tydens die reddingsoperasie, is die laaste gedeelte tot by die werkers met die hand gegrawe.
Die werkers is verlede week vir die eerste keer lewend gesien toe ʼn endoskopiese kamera by ʼn dun pyp, wat gebruik word om suurstof, kos en water aan die vasgekeerde mynwerkers te verskaf, afgestuur is.
Die werkers het genoeg ruimte in die tonnel gehad. Die gebied binne is sowat 8,5 meter hoog en twee kilometer lank.
Baie goeie nuus.
Wow, bly hul almal is veilig !