Australiër uit krokodilkaak gered

’n Australiese man is Vrydag uit ’n die kake van ’n krokodil gered. (Argieffoto)

’n Australiese man het ’n noue ontkoming gehad toe hy Vrydag in die bek van ’n sowat 2, 5 meter lange krokodil beland het.

Die man het saam met ’n vriend in ’n rivier naby die Cape York-skiereiland in die noorde van Queensland geswem toe die voorval gebeur het. Hy het ernstige beserings aan sy kop, bors en arms opgedoen.

Die man is deur sy vriend gered, wat beserings aan sy arms tydens dié reddingspoging opgedoen het.

Die mans is glo weermagpersoneel. ’n Weermag-paramedikus wat in die omtrek was, het hom dadelik na die toneel gehaas om die man te behandel en die bloeding te probeer stop.

Die enorme reddingspoging wat ná die aanval gevolg het, het ’n helikopter én ʼn vlug na Cairns, byna 800 km suid van Cape York, ingesluit.

Albei mans sterk tans in ’n hospitaal in dié stad aan.

Denis O’Sullivan van die Queensland-ambulansdienste het aan internasionale media gesê die man kan dankbaar wees die krokodil was nie groter nie.

Cape York is deel van die kusgebied van Queensland wat as Croc Country bekend staan weens die groot aantal soutwaterkrokodille wat hier voorkom. Dié gebied strek so ver suid as Gladstone.

Queensland se omgewingsdepartement waarsku in ’n inskrywing op sy webblad dat krokodille altyd teenwoordig is, al is hulle nie sigbaar nie.

“Krokodille kan vir langer as ’n uur onder water bly en selfs in kniediep water onsigbaar wees,” lui die inskrywing.