Jeremy Renner (Foto: Theo Wargo/GETTY IMAGES NORTH AMERICA/Getty Images via AFP)
Die akteur Jeremy Renner, wat bekend is vir sy rol as Hawkeye in verskeie Marvel-rolprenttreffers, is in ’n kritieke maar stabiele toestand ná ’n ongeluk.
Renner het sneeu geploeg toe hy ernstige beserings opgedoen het, het ’n verteenwoordiger van die akteur aan The Hollywood Reporter en Deadline gesê.
Dit is nog nie duidelik waar die ongeluk plaasgevind het nie. “Sy familie is by hom en hy ontvang uitstekende sorg,” het die verteenwoordiger van die akteur bygevoeg.
Renner (51) is vir Oscars benoem vir sy rolle in The Hurt Locker en The Town.
Hy is veral bekend vir sy rol as Clint Barton, ook bekend as die superheld Hawkeye, in verskeie Marvel-rolprente en ’n onlangse minireeks.
Renner besit ʼn eiendom naby Mt Rose-Ski Tahoe, ʼn ski-oord naby Reno in Nevada wat erg deur die onlangse sneeustorm getref is.
