Foto’s bied ʼn blik op die wêreld wat nie noodwendig in woorde beskryf kan word nie. Beleef al die nuusgebeure, een foto op ʼn slag.
Baba Jesus-poppe word op die enjinkap van ʼn motor uitgestal in Michoacan, Meksiko, voor die viering van Dia de la Candelaria of die Maria-Ligmis op 2 Februarie. (Foto: Rebecca Blackwell, AP)
Timea Babos van Hongarye en Kristina Mladenovic van Frankryk soen die Australiese Ope-dubbelspeltrofee vir vroue nadat hulle die Taiwannese Hsieh Su-Wei en Barbora Strycova van die Tsjeggiese Republiek by die tennistoernooi in Melbourne, Australië, verslaan het. (Foto: Andy Wong, AP)
Begrafnisondernemers ontsmet hulself ná die hantering van ʼn koronavirusslagoffer in Wuhan, China. (Foto: Chinatopix, AP)
Betogers het ʼn polisiebeampte met rooi verf gegooi tydens ʼn protesoptog teen die moord op twee vroue in Meksiko-stad. Twee vroue-aktiviste, die prokureur Yunuen Lopez Sanchez en Isabel Cabanillas de la Torre, is die afgelope week vermoor. (Foto: Ginnette Riquelme, AP)
Britse parlementslede dra ʼn Britse vlag (Union Jack) terwyl hulle met hul bagasie uit die Europese parlement in Brussel marsjeer om die Eurostar-trein terug na Brittanje te neem. (Foto: Francisco Seco, AP)
