Oom skiet kleuter glo dood ná familietwis

Andrew Huber-Young (Foto: Twitter)

’n 19-jarige man van die staat Maine in die VSA is Sondag in hegtenis geneem vir die moord op sy broerskind, na afloop van ’n familietwis.

Volgens die polisiedepartement word Andrew Huber-Young daarvan aangekla dat hy Saterdag om 16:20 na bewering drie mense in ʼn huis in Wells, Maine, geskiet het.

Twee volwasse mans is met nie-lewensbedreigende beserings na plaaslike hospitale vervoer. ʼn Kind, geïdentifiseer as die tweejarige Octavia Huber-Young, het in die hospitaal aan haar beserings beswyk.

Voorlopige inligting dui daarop dat die twee beseerde mans as Huber-Young se pa en broer geïdentifiseer is. Octavia was Huber-Young se broerskind.

#JustIn: Maine State Police confirm two-year-old Octavia Huber Young died after being shot in Wells yesterday. 19-year-old Andrew Huber Young was arrested and charged with murder. Two males were also shot and suffered non-life threatening injuries. pic.twitter.com/6vYJOPRVXp

— Sam Rogers (@slaminsamNCM) May 22, 2022

Volgens die familie het Huber-Young ’n vuurwapen in die huis uitgepluk en begin skiet nadat sy pa hom in kennis gestel het dat hy hom uit die huis skop. Hy het ’n skoot op sy broer afgevuur terwyl hy vir Octavia vasgehou het.

Octavia se ma was ten tyde van die voorval by die werk.

Huber-Young is ’n dag later in hegtenis geneem en na die York County-gevangenis geneem waar hy tans in aanhouding is.

Huber-Young word aangekla van moord en nog klagte kan na verwagting bygevoeg word namate die saak vorder.

FoxNews, New York Post