Skermgreep uit die video (Video: Il Messaggero/Facebook)
ʼn Leeu het Saterdag vir ʼn paar uur lank vry rondgeloop in die strate van ʼn kusdorp in Italië ná hy uit ʼn plaaslike sirkus ontsnap het. Die leeu is later verdoof en aangekeer.
Alessandro Grando, burgemeester van Ladispoli naby Rome, het inwoners gewaarsku om by die huis te bly terwyl die polisie en personeel van die sirkus na die dier op soek was.
Video’s wat later deur Italiaanse media gedeel is, glo geneem deur plaaslike inwoners maar nie bevestig deur AFP nie, wys hoe die volwasse leeu deur donker, verlate strate stap.
Grando het in ʼn Facebook-plasing omstreeks 22:30 (2130 GMT), meer as vyf ure ná die oorspronklike boodskap waarin hy alarm gemaak het, gesê die leeu is “verdoof en aangekeer”.
“Nou sal hy aan sirkuspersoneel oorgegee word,” het hy geskryf. Hy het nooddienste en vrywilligers bedank wat “tydens hierdie ure van groot kommer” hulp verskaf het.
“Ek hoop dat hierdie voorval mense se gewete sal aanraak en dat ons uiteindelik ʼn einde kan bring aan die uitbuiting van diere in sirkusse,” het die burgemeester bygevoeg.
Hy het vroeër benadruk hy het nie goedkeuring gegee vir ʼn sirkus met leeus in die dorp nie, maar het nie die mag om dit teen te staan nie.
Shoe, wat ń pragtige dier…
Ten minste lyk hy goed versorg.
Maar ek is ook ten sterkste gekant deur diere in sirkusse gebruik.
Dit grens vir my aan diere mishandeling.