Beers en Blevins trap na skofsukses

Die Absa Cape Epic is een van die gewildste inskrywings op die internasionale bergfietskalender. Foto: Twitter.

Matthew Beers en Christoper Blevins van die Toyoto-Specialized-NinetyOne-span het die tweede skof van die Absa Cape Epic gewen.

Beers, ʼn 28-jarige Suid-Afrikaner, het saam met sy Amerikaanse spanmaat die skof van 116 km in ʼn tyd van 4:20:31 kafgetrap.

Die Switserse duo van Nino Schurter en Andri Frischknecht was kort op hul hakke, gevolg deur Georg Egger en Lukas Baum (verlede jaar se wenspan).

Ná twee skofte is Schurter en Frischknecht die algehele voorlopers, gevolg deur Egger en Baum.

Wowzers! Matt Beers surges ahead like lightning on the Highveld and drops the SCOTT-SRAM MTB Riders; Blevins times his attack to perfection and Toyota-Specialized-NinetyOne wins Stage 2 with a brilliant tactical final kilometre. Superb cycling. #capeepic pic.twitter.com/rOIRwMNyGn

— capeepic (@CapeEpic) March 21, 2023

In die vroueafdeling het die sterre van die Kaapstad-fietstoer, Kim le Court en Vera Looser, die septer geswaai.

Die twee het die skof in ʼn tyd van 5:28:42 gewen, terwyl daar ʼn titaniese stryd om die tweede en derde plek was.

Sofia Gomez Villafane en Katerina Nash was tweede by die eindstreep; net ʼn paar millisekondes voor Suid-Afrika se Amy Wakefield en Candice Lill.

Deelnemers pak môre die derde skof van 100 km tussen Hermanus en die Oak Valley-landgoed aan.

Kim Le Court and Vera Looser (Efficient Infiniti Insure) win Stage 2 in the @CMcom_ Women's Category. A fine attack at the end and no one can catch them. #capeepic #untamed pic.twitter.com/NYczHWk6Ll

— capeepic (@CapeEpic) March 21, 2023

• Skofuitslae:

Mans:

1. Matthew Beers en Christoper Blevins (Toyota-Specialized-NinetyOne): 4:20:31
2. Nino Schurter en Andri Frischknecht (Scott-Sram MTB Racing): 4:20:46
3. Georg Egger en Lukas Baum (Orbea x Leatt x Speed Company): 4:23:05

Vroue:

1. Kim le Court en Vera Looser (Efficient Infiniti Insure): 5:28:42
2. Sofia Gomez Villafane en Katerina Nash (NinetyOne-Songo-Specialized): 5:28:47,1
3. Amy Wakefield en Candice Lill (e-FORT.net: SeattleCoffeeCo): 5:28:47,8