Toeskouers sal kwalik hul oë kan knip wanneer die F1-aksie op 2 April in Melbourne is; organiseerders beloof immers die vinnigste wedren nóg in dié geweste.
ʼn Vierde DRS-strook sal ongetwyfeld vir bykomende woema sorg en renjaers kan teen ʼn spoed van tot 340 km/h op die Albert Park-baan rondblits.
DRS (oftewel die Drag Reduction System) is ʼn F1-meganisme waar ʼn renmotor se agterste drukvlerk op sekere plekke tydens ʼn ronde oopgemaak kan word om die windweerstand te verminder. Dit word ingestel sodat die motor ʼn hoër topspoed kan bereik; sodoende kan renjaers mekaar ook makliker in dié spesiale stroke verbysteek.
Hulle word dan as’t ware aangemoedig om voet in die hoek te sit.
Andrew Westacott, Australië se Grand Prix-hoof, het die nuus van ʼn vierde DRS-strook bevestig en hy is opgewonde oor wat die verwikkeling vir die deelnemers en toeskouers inhou.
“Dit gaan die vinnigste wedren ooit in Melbourne wees,” was sy raakvatopsomming.
“Nie net sal die motors beter as vantevore wees nie, maar DRS sal ook almal se gemiddelde spoed ʼn aansienlike hupstoot gee. Ons verwag blitsige rondes om die baan.”
Charles Leclerc het verlede jaar die Australiese Grand Prix op ʼn drafstap gewen toe hy meer as 20 sekondes voor Sergio Perez en George Russell klaargemaak het.
Max Verstappen het egter met meganiese probleme gesukkel en hy moes noodgedwonge in die 40ste ronde die handdoek ingooi.
Hoewel Leclerc kort daarna magteloos moes toekyk hoe Verstappen die een wedren ná die ander wen en met die uiteindelike kampioenskaplouere wegjaag, is hy oorgehaal om sy stempel op die komende seisoen af te druk.
“Die uiteindelike doelwit is om die kampioenskaptitel in te oes en ek kan nie wag om weer agter die stuur in te skuif nie. Verlede jaar was inderdaad ʼn tree in die regte rigting, maar ons sal meer bestendig moet wees. Ons sal meer gereeld wedrenne moet wen,” het die Monaco-boorling gesê.
- Wedrenbepalings:
5 Maart: Bahrein
19 Maart: Saoedi-Arabië
2 April: Australië
16 April: China
30 April: Azerbeidjan
7 Mei: Miami
21 Mei: Emilia Romagna in Imola
28 Mei: Monaco
4 Junie: Spanje
18 Junie: Kanada
2 Julie: Oostenryk
9 Julie: Verenigde Koninkryk
23 Julie: Hongarye
30 Julie: België
27 Augustus: Nederland
3 September: Italië
17 September: Singapoer
24 September: Japan
8 Oktober: Katar
22 Oktober: VSA
29 Oktober: Mexiko
5 November: Brasilië
18 November: Las Vegas
26 November: Abu Dhabi
Kan nie meer wag nie.
My Pa ook nie Max Verstappen is my Pa se gunsteling Dis al hoekom my Pa die dstv nog aan hou is vir motorsport