Die tweede T20-krieketwedstryd tussen die vroue-spanne van Suid-Afrika en Nieu-Seeland het Sondag op Buffalopark in Oos-Londen ook uitgereën.
Nadat Vrydag se eerste wedstryd nie kon plaasvind nie oor deurdringende reën, het Nieu-Seeland darem Sondag gekolf.
Die Kiwi’s kon net 111/9 in 20 boulbeurte uitkom met Maddy Green (45*) die enigste kolwer wat weerstand kon bied.
Die Proteas se beste bouler was die draaibalbouler Chloe Tryon (4/15).
Dit het net na Nieu-Seeland se kolfbeurt weer begin reën en met ʼn buiteveld wat erg deurgeloop het ná Vrydag en Saterdag se reën, is daar halt geroep.
Die derde van vyf T20-wedstryde word Dinsdag ook in Oos-Londen gespeel met die laaste twee wedstryde komende Saterdag en Sondag in Benoni.