Daar was al ’n hele paar seremoniemeesters wat met ’n briljante faux pas by ’n troue vorendag gekom het. Soos om die bruid met die bruidegom se vorige meisie te verwar.
Daar is ’n frons of twee, maar later lag almal weer lekker saam terwyl hulle na nog ’n sokkietreffer luister.
Gavin Williamson, die Verenigde Koninkryk se onderwysminister, het in ’n soortgelyke slaggat getrap toe hy die Manchester United-ster Marcus Rashford se lof ná ’n Zoom-sessie besing het.
“Ons het op Zoom gesels en hy was baie passievol en vriendelik, maar hy moes kort daarna weer gaan. Ek wou beslis nie in die pad van sy voorbereidingswerk staan nie,” het Williamson aan die Britse media gesê.
Sy adviseurs het egter later gesê dat hy eintlik met Maro Itoje gepraat het – die Engelse rugbyspeler wat hom daarvoor beywer dat jong mense toegang tot skootrekenaars kry.
“As gevolg van die onlangse bespiegelinge het ek dit goedgedink om te bevestig dat ek nie Marcus Rashford is nie,” het Itoje sedertdien op sosiale media geskerts.
Op sy beurt het Williamson gesê dat hy bloot ’n eerlike fout gemaak het.
“Ons het die fout met die joernalis reggestel voordat die storie gepubliseer is. Ek het baie respek vir Marcus Rashford en vir Maro Itoje,” het Williamson gesê.
Maar in die vreemde tye waarin ons leef word daar dikwels ’n mediaberg van ’n molshoop gemaak.
David Lammy, ’n politikus, het vir Williamson as “onkundig en onbekwaam” bestempel. Volgens Wales Online is die woordvoerder van Boris Johnson (Britse eerste minister) selfs gevra of dit rassisties is om die twee sportmanne met mekaar te verwar.
This is appalling.@GavinWilliamson what was it about @maroitoje that made you mistake him for @MarcusRashford?
You must be the most ignorant, clueless and incapable Education Secretary in the UK's history. https://t.co/DaXpGPBzWq
— David Lammy (@DavidLammy) September 8, 2021
Due to recent speculation I thought it was necessary to confirm that I am not Marcus Rashford… And whilst we are here my name is not Mario either!! Just a simple Maro Itoje will do…
Much love,
Marcu… I mean Maro Itoje
— Maro Itoje (@maroitoje) September 8, 2021