Eilandmanne verrinneweer Blitsbokke in LA

Die Blitsbokke het met 45 – 5 teen Samoa verloor. Foto: Twitter.

Dinge het glad nie volgens plan vir die Blitsbokke in Los Angeles verloop nie en hulle het sleg teen Fidji (28–7 in die bekerkwarteindstryd) en teen Samoa (45–5 in ’n uitspeelwedstryd om die vyfde plek) verloor.

Ja, die gure weer het die spel moeilik gemaak, maar sou die Suid-Afrikaners in hul sewesgloriedae só sleg verloor het? Waarskynlik nie.

Hulle het nou na die derde plek op die amptelike punteleer teruggeval, terwyl Nieu-Seeland hul houvas op die reeks verstewig het toe hulle vir Argentinië in die bekereindstryd met 22–12 geklop het.

Wat veral kommerwekkend vir die Blitsbok-bestuur moet wees, is dat die spelers eintlik heel skaflik in die vorige toernooie in Hamilton en Sydney gespeel het. Dit is inderdaad soos wat Jak de Priester sing – daar is ’n fyn lyn tussen hero en zero.

Die Suid-Afrikaners sal egter vinnig hul sokkies moet optrek; die volgende toernooi begin op 3 Maart in Vancouver.

Sublime try from Falaniko!@manusamoa7s are off to a flyer ❗#LA7s | #HSBC7s pic.twitter.com/p4BF73MJRp

— World Rugby 7s (@WorldRugby7s) February 26, 2023

Sewespunteleer:

1. Nieu-Seeland: 107 punte
2. Argentinië: 86 punte
3. Suid-Afrika: 86 punte
4. Fidji: 84 punte
5. Samoa: 81 punte
6. Australië: 77 punte
7. Frankryk: 76 punte
8. VSA: 69 punte
9. Ierland: 68 punte
10. Groot-Brittanje: 47 punte.