Steven Kitshoff. (Foto: X/Ulster)
Steven Kitshoff draf Saterdag weer op die DHL-stadion uit, maar dié keer sal die Springbok-stut in die kleure van Ulster wees.
Die voormalige Stormers-kaptein sal die nommereentrui vir die besoekende Ierse klubspan in sy Verenigde Rugbykampioenskap-ontmoeting met die Kapenaars dra.
Onder die Wêreldbeker-wenner se leiding het die Stormers destyds die silwerware in sy eerste VRK-seisoen omhoog gehou, terwyl hulle verlede jaar in die eindstryd teen Munster verloor het.
Dit is Kitshoff se eerste wedstryd terug in Kaapstad sedert hy ná die Wêreldbeker-skouspel in Parys deel van die Belfast-opset geword het.
Ná ʼn stadige begin saam met sy nuwe span het die Ulster-skrum intussen vlamgevat en Dan McFarland was vol lof vir die Suid-Afrikaanse invoerproduk.
“Ek dink sy algemene spel – en nie net sy skrumwerk nie – is een van sy grootste sterk punte. Hy dra die bal uitstekend, hy verdedig goed en hy is altyd ʼn gevaar op die veld,” het die voormalige Ulster-afrigter gesê.
Kitshoff sal teen ʼn aanvanklike Stormers-voorry van Brok Harris, Joseph Dweba en Neethling Fouché te staan kom, terwyl Frans Malherbe op die plaasvervangersbank wag.
???? Team News
Your Ulster side to take on Stormers tomorrow in Cape Town! ????????
???? | @ViaplaySportsUK pic.twitter.com/hn6U5QPXfs
— Ulster Rugby (@UlsterRugby) March 29, 2024
Intussen gaan Hacjivah Dayimani in sy 50ste wedstryd vir die Kapenaars uitdraf en afrigter John Dobson hoop dat sy span op sy goeie vertoning teen Edinburgh sal voortbou.
“Ons was goed op die aanval teen Edinburgh, maar ons weet dat ons met meer akkuraatheid kan speel. Ons sal beslis op ons beste teen Ulster moet wees,” het Dobson gesê.
Die wedstryd begin Saterdag om 19:15 en dit word regstreeks op SuperSport uitgesaai.
We've got @Hacjivah bringing up his 50 at DHL Stadium on Saturday. #iamastormer #dhldelivers pic.twitter.com/m5Vi11LRC1
— DHL Stormers (@THESTORMERS) March 29, 2024
Stormers: Warrick Gelant (heelagter), Suleiman Hartzenberg (regtervleuel), Dan du Plessis (buitesenter), Damian Willemse (binnesenter), Leolin Zas (linkervleuel), Manie Libbok (losskakel), Paul de Wet (skrumskakel), Evan Roos (agtsteman), Hacjivah Dayimani (flank), Willie Engelbrecht (flank), Ruben van Heerden (slot), Salmaan Moerat (slot en kaptein), Neethling Fouché (stut), Joseph Dweba (haker) en Brok Harris (stut). Plaasvervangers: JJ Kotze, Leon Lyons, Frans Malherbe, Adre Smith, Ben-Jason Dixon, Marcell Theunissen, Herschel Jantjies en Ben Loader.
Ulster: Mike Lowry (heelagter), Rob Baloucoune (regtervleuel), James Hume (buitesenter), Stuart McCloskey (binnesenter), Ethan McIlroy (linkervleuel), Nathan Doak (losskakel), John Cooney (skrumskakel), Nick Timoney (agtsteman), David McCann (flank), Matty Rea (flank), Kieran Treadwell (slot), Harry Sheridan (slot), Tom O’Toole (stut), Rob Herring (haker en kaptein) en Steven Kitshoff (stut). Plaasvervangers: Tom Stewart, Andrew Warwick, Scott Wilson, Cormac Izuchukwu, Marcus Rea, Dave Shanahan, Jake Flannery en Stewart Moore.
