Stuart Hogg het Sondag sy onmiddellike uittrede uit rugby aangekondig. (Foto: Andy Buchanan/AFP)
Skotland se rugbykaptein Stuart Hogg het Sondag sy onmiddellike uittrede uit rugby aangekondig.
Hogg sê ondanks sy beste pogings is sy liggaam bloot net nie meer in staat om die naderende Wêreldbeker-toernooi te trotseer nie.
Die 31-jarige heelagter van Exeter – wat 100 internasionale wedstryde agter die blad het – was van voorneme om sy stewels op te hang ná die skouspel in September in Frankryk, maar sê hy moes helaas nou al die aftog blaas.
“Dit is moeilik, maar met groot hartseer en enorme trots kondig ek my onmiddellike uittrede uit rugby aan,” het Hogg in ʼn verklaring wat deur die Skotse Rugbyunie uitgereik is, gesê.
“Ek het geveg met alles wat ek gehad het om by die Wêreldbeker-toernooi te wees, maar hierdie keer kon my liggaam nie die dinge doen wat ek wou en moes doen nie.
“Ons het geweet hierdie dag sou uiteindelik aanbreek; ek het net nooit gedink dit sou so gou wees nie.”
Hogg het in 2012 sy internasionale rugbydebuut gemaak en het een van Skotland se voorste puntemakers van alle tye geword.
Hy het tussen 2020 en 2022 as Skotse kaptein diens gedoen en was ook in die span vir drie toere van die Britse en Ierse Leeus in 2013, 2017 en 2021.
Sy 100ste wedstryd vir Skotland was egter ook sy laaste een toe dié land teen Ierland in die Sesnasies-reeks in Maart meegeding het. Hogg moes weens ʼn enkelbesering die veld vroeg verlaat.
“Dit is moeilik om in woorde te beskryf watter uitwerking rugby op my lewe gehad het,” sê Hogg.
“Ek gaan uittree met die wete dat ek my lyf en hart aan rugby gegee het.
“Ek sal vir ewig dankbaar wees vir hierdie wonderlike gemeenskap en kan nie wag om my reis as ʼn trotse ondersteuner van die span te begin nie.”
Hogg se uittrede is ʼn groot slag vir Skotland se Wêreldbeker-voorbereiding. ʼn Moeilike paar wedstryde wag op die Skotte, veral dié teen Ierland en verdedigende kampioen Suid-Afrika, in poel B van die Wêreldbeker.
“Ek het die voorreg gehad om Stuart vir die grootste deel van sy loopbaan af te rig, en hy was ʼn plesier om mee te werk en te aanskou op die oefenveld en in wedstryde,” sê Skotland se afrigter, Gregor Townsend.
“Om vanjaar 100 wedstryde te haal, was gepas en ʼn beloning vir ʼn loopbaan wat verseker het dat hy trofees binnelands en op Europese vlak gewen het.
“Ons respekteer sy besluit om nou weg te stap en verstaan die spanning en uitdagings waardeur sy liggaam die afgelope seisoene gegaan het.”
Dit is nou ‘n gatslag vir die Skotte!
Ego speel ‘n baie groot rol. Jy het al ‘n paar jaar voor die tyd geweet jou lyf gaan nie meer reg wees vir internationale rugby nie, maar het aangehou met die hoop om te speel.
Hulle kon hierdie ekstra paar jaar gebruik het om nuwe kaptein voor te berei en nuwe speler in sy plek, nou moet hulle dit in ‘n paar jaar doen.
Dit laat jou span in ‘n posisie waar hulle nou moet spartel om die regte persone te kry om jou plek te vat.
Maar ja, dit is ‘n geweldige trots om vir jou land uit te draf en jy sal dit vir so lank as moontlik doen, maar ‘n mens moet na realiteite kyk. En hy is ook nie die eerste of laaste wat voor ‘n groot toernooi uittree nie
Dit is die afrigter se veranrwoordelikheid om altyd meer as 1 speler te brei vir onverwagte gebeure.
Daarmee stry ek glad nie, afrigter moet planne het vir onverwagte gebeure, maar as ‘n speler realisties is dan gaan hy weet hy sal nie teen die WB nog op standaard wees nie.
Dit sal dit net soveel makliker maak vir diegene wat moet oorvat by hom.
Ek het hom nie sleggesê of iets nie, dis maar mens om optimisties te wees oor jou vermoe, en ongelukkig is dit baie keer oor optimisties
Dis ‘n jammerte , veral vir Skotland. Hy was een puik speler.