Duhan van der Merwe was oudergewoonte ’n doring in sy teenstanders se vlees. Foto: Andy Buchanan/AFP.
Die son het vandag op Murrayfield en op die Skotse rugbyspan geskyn, maar die tuisspan het ʼn bietjie gesweet om in hul Sesnasies-kragmeting met Italië af te reken.
Die Azzurri het in die doodsnikke van die wedstryd op die doedelsakblasers se doellyn geboer. En met net vyf punte die verskil tussen die twee spanne op die telbord was enigiets nog moontlik.
Maar die besoekers se konsentrasie en afrondingswerk het deurgaans gelol en die tuisspan het eerstens omgekeerde balbesit bewerkstellig, waarna Duhan van der Merwe en Blair Kinghorn hul ore platgetrek het om die wedstryd met 26 – 19 vir die Skotte te beklink.
ABSOLUTELY SENSATIONAL FINISH IN EDINBURGH! #SCOvITA | #GuinnessSixNations pic.twitter.com/mqX36oHRCU
— Guinness Six Nations (@SixNationsRugby) March 18, 2023
Kinghorn het ʼn driekuns van drieë behaal, terwyl die Suid-Afrikaans gebore Van der Merwe oudergewoonte met sy atletiese vermoë beïndruk het.
Die George-boorling het in die Skotte se sege op Twickenham die Rose se verdediging oopgekloof en hy het vandag soos ʼn wafferse akrobaat oor die Italianers se doellyn geduik om ʼn verdediger te klop én sy span se eerste drie te druk.
This is an absurd piece of athleticism. https://t.co/vgw2CmxGjK
— James Austin (@JamesDAustin) March 18, 2023
Die oorwinning beteken dat Skotland so te sê daarvan verseker is om die Sesnasies-toernooi in die derde plek af te sluit.
Daarteenoor kon die Italianers nog net een van hul laaste 42 kragmetings in die reeks wen. Tog het hulle vandag met ʼn moedige vertoning vorendag gekom om so amper ʼn rustydagterstand van 19 – 6 uit te wis.
Sesnasies-punteleer:
- Ierland: 19 punte
- Frankryk: 15 punte
- Skotland: 15 punte
- Engeland: 10 punte
- Wallis: 5 punte
- Italië: 1 punt.
