Rory McIlroy Foto: News Limited
Gholf:
- Eers was daar UFC-gevegte en nou was daar regstreekse gholfaksie op die kassie.
Die wêreld se voorste gholfspeler, Rory McIlroy, het saam met Dustin Johnson vir Rickie Fowler en Matthew Wolff in ’n liefdadigheid-tweestryd in Florida getroef.
Dit was die eerste regstreekse gholfaksie in die Covid-19-era en meer as $5,5 miljoen is ingesamel.
Eerskomende Sondag sal Tiger Woods en Phil Mickelson saam met Tom Brady en Peyton Manning (Amerikaanse voetbalsterre) in nóg ’n liefdadigheidsinisiatief speel.
Die aksie sal weer eens op SuperSport uitgesaai word.
Rugby:
- Beauden Barrett het skaars by die Blues begin oefen of hy het ’n fiksheidsrekord agter sy naam.
Die voormalige Hurricanes-ster het die moordende Bronco-fiksheidstoets in ’n nuwe rekordtyd voltooi. Spelers moet lopies van 20 m, 40 m en 60 m vyf keer herhaal.
Die 28-jarige Barrett het die toets in ’n tyd van 4:12 voltooi.
- Volgens mediaberigte stel die Stormers in die dienste van die Springbok-heelagter Warrick Gelant belang.
Met Dillyn Leyds (La Rochelle) en Jean-Luc du Plessis (Honda Heat) wat kontrakte met oorsese klubs gesluit het, is die Kapenaars ietwat broos op heelagter.
Die 25-jarige Gelant het sy skoolloopbaan aan Hoërskool Outeniqua in George voltooi, maar is direk ná skool Pretoria toe.
Jake White, die Bulls se nuwe direkteur van rugby, wil egter vir Gelant by die Bulls hou.
