Hierdie 1931 Nash Tourer van Potgietersrus sal by die uitstalling te sien wees. (Foto: Verskaf)
Meer as 2 500 klassieke motors word dié naweek by die gewilde Cars in the Park by Zwartkops-renbaan in Centurion, Gauteng, verwag.
Die jaarlikse Classic Car Spectacular word deur Pretoria Old Motor Club gereël. Die eerste uitstalling het amper 40 jaar gelede in Silverton plaasgevind en daar is nét 15 karre uitgestal. Die afgelope paar jaar het tot 3 000 klassieke en veteraanmotors by elke uitstalling opgedaag.
Vanjaar sal daar verskeie spesiale voertuie op uitnodiging in die kuipe uitgestal word. Een só ʼn motor is Allie van Jaarsveld se 1903-Peugeot, ʼn piepklein enkelsilindermotortjie. Lazarus Ford Centurion gaan die heel nuutste Bullitt Mustang ten toon stel.
Daar word ʼn magdom verskillende voertuie verwag, alles van ʼn nuut gerestoureerde Seat Abarth 750 GT, talle Unimogs en Volvo- militêre voertuie. Die lys is byna nimmereindigend.
Hierdie oulike 1903 Peugeot sal die oudste voertuig by vanjaar se Cars in the Park wees. (Foto: Verskaf)
Daar sal Sondag verskeie stalletjies wees wat allerhande motorverwante items gaan verkoop, asook heerlike kos- en drinkgoedstalletjies. Dit is die ideale geleentheid vir ʼn pretdag saam met die hele gesin.
Cars in the Park vind Sondag 4 Augustus by Zwartkops-renbaan plaas. Elke bestuurder en een passasier kry gratis toegang tot die uitstalling solank hulle voor 09:00 opdaag om hul voertuig uit te stal. Toegang tot die skou is R100 per volwassene en gratis vir kinders onder 12. Die hek maak om 08:00 vir toeskouers oop.
Parkering is langs Zwartkops gereël op die R55.
Vir meer inligting besoek: http://www.pomccitp.co.za/
-
- ‘n Seldsame Seat Abarth 750 GT wat ook by die uitstalling te sien sal wees. (Foto: Verskaf)
-
- Die Mustang Bullitt herdenkingsmodel wat deur Lazarus Ford by Cars in the Park uitgestal sal word. (Foto: Verskaf)
-
- Die Capri word vanjaar 50 jaar oud. Hierdie is die Perana V8-weergawe deur Basil Green. (Foto: Verskaf)
-
- ‘n Studebaker polisiemotor van die middel 1950’s. (Foto: Verskaf)
-
- Mini sal in Augustus 2019 sy 60ste bestaanjaar vier. (Foto: Verskaf)
-
- Die BMW Isetta, ook bekend as die “bubble car”. (Foto: Verskaf)
-
- (Foto: Verskaf)
-
- ‘n Ford Model A wat vanaf 1928 tot die vroeë 1930s gebou is. (Foto: Verskaf)
Gps verwysing asb.
Kan nie wag vir die instelling! :)
Net vir interessantheid vir die “petrolkoppe”: die 2019 Thunder Tour deelnemers vertrek ook vanaf hierdie punt gedurende die dag. Dit is almal V8’s, en die motors sal deel uitmaak van die uitstalling die oggend. Great om die “thunder” te hoor as daardie voertuie almal gelyktydig gestart word…… Kyk gerus na “The Thunder Tour” facebook blad.