LOVE ACTUALLY
⭐⭐⭐⭐⭐⭐⭐⭐ (8/10)
Met Hugh Grant en Liam Neeson
Regisseur: Richard Curtis
(Slegs in Ster Kinekor-teaters)
Jy het nog nie Love Actually gesien nie? Huh? Of wag, dalk op ʼn klein televisieskerm of selfs ʼn selfoon wat so piepklein soos ʼn toiletstrokie is?
Hierdie klassieke Kersfeesrolprent is vanjaar 20 jaar oud, en as jy tans bedruk is oor die toestand waarin ons geplunderde en wanbestuurde land hom bevind, gun jouself die fliek.
Love Actually gaan oor agt verskillende paartjies, onder meer ʼn kostelike Hugh Grant as die eerste minister van Brittanje, wat mekaar vind, of nie vind nie, verlief raak, Kersfees elk op ʼn ander manier ervaar, en vrolike Kersversierings ophang, in die week voor Kersfees.
Genade, maar dis snaaks, menslike warmhartigheid, barmhartigheid en vrolik-boeiend. As jy dit nog nie gesien het nie, haas jou na die naaste teater waar Love Actually wys en verdrink in die lekkerte van goeie mense wat nog omgee vir hulle medemens en Kersfees in styl vier.
Lag, giggel, raak verstom, raak meegevoer, maar gun jouself Love Actually. Ten sterkste aanbeveel.
Die heruitreiking van Love Actually – slegs vir een week in uitgesoekte Ster Kinekor-teaters.
(8/10)