THE HOLDOVERS
⭐⭐⭐⭐⭐⭐⭐⭐⭐(9/10)
Met Paul Giamatti en Da’Vine Joy Randolph
Regisseur: Alexander Payne
(Slegs in teaters)
Baie mense kla dikwels dat Hollywood nie meer rolprente soos Dead Poets Society maak nie. Wel, vrees nie meer nie, want The Holdovers neig nogal in daardie rigting.
Dit gaan weer oor die verhouding tussen ʼn onderwyser en ʼn groep testosteroon-besmette seuns wat op die rand van volwassenheid staan.
Anders as in Dead Poets Society is Paul Giamatti, wat vir ʼn Oscar benoem is vir sy rol as die onderwyser, ʼn regte ou knorpot. Hy hou van niemand nie, en niemand hou van hom nie. Tot hy matrieks gedurende die Kersweek in die VSA moet oppas.
Die noodlot bepaal dit so dat net hy, die sjef en ʼn verwarde, neurotiese skoolseun, verrassend goed gespeel deur nuweling Dominic Sessa, alleen oor Kersfees in die onvriendelike, neerdrukkende gebou agterbly. Wat daar gebeur, verander veral die onderwyser se lewe vir altyd.
Jy vermoed dalk wat gaan gebeur, maar dis die komiese en ook hartseer reis na die besielende einde toe wat The Holdovers so inspirerend maak. As jy in ʼn winkelsentrum is waar dit wys, en jy is pootuit van die hitte en die pakkies, gaan ontspan met springmielies en ietsie te drinke in ʼn koel teater.
The Holdovers sal jou tyd heerlik met twee uur verkort, en Giamatti staan ʼn baie goeie kans om die Oscar as beste akteur te wen.
Slegs in teaters.
(9/10)