Die voormalige Disney Channel-akteur, Mitchel Musso, is Saterdag in Texas in die VSA op verskeie aanklagtes, insluitend openbare dronkenskap, in hegtenis geneem.
Die 32-jarige het die karakter van Oliver Oken tussen 2006 en 2011 teenoor Miley Cyrus in die televisiereeks Hannah Montana vertolk.
Fox News berig dat Musso volgens die Rockwall-polisiedepartement van vyf oortredings, wat spruit uit ‘n voorval by ‘n hotel in Texas ná 19:00 die aand, aangekla is.
Hy het na bewering ʼn hotel binnegegaan terwyl hy onder die invloed van alkohol was, waarna hy ʼn pakkie skyfies uit die hotelwinkel geneem en begin eet het.
Ex-‘Hannah Montana’ actor Mitchel Musso arrested after allegedly stealing bag of chips https://t.co/mP68bmYfu7 pic.twitter.com/XhBkLQws7v
— New York Post (@nypost) August 28, 2023
Luidens ʼn verklaring wat aan Fox verskaf is, het Musso geweier om vir die skyfies te betaal en verbaal beledigend teenoor die hotelpersoneel geraak.
Polisiebeamptes het Musso buite die hotel aangekeer en vir openbare dronkenskap en diefstal in hegtenis geneem. Die polisie het ná sy inhegtenisneming ontdek dat die akteur verskeie uitstaande lasbriewe vir verkeersboetes het, aldus die New York Post.
Hy het een nag in die Rockwall County-aanhoudingsentrum deurgebring en is Sondagmiddag op borgtog vrygelaat.
Owerhede het ʼn gesigfoto (“mugshot”) van Musso uitgereik waarin hy terneergedruk lyk en met ‘n handdoek oor sy bors poseer.
Die akteur het nog nie kommentaar oor die voorval gelewer nie.
Bronne: Fox News Digital, New York Post.
Meeste Hollywood akteurs lei aan depressie en gebruik drank, dwelms ens om van donker dinge, stres en skandes in hul lewe weg te vlug. Dan tree hulle onverantwoordelik op en beland in die moeilikheid. So bly ek lewe nie in daai wêreld nie….. net genade van Bó. Dankie Vader.