[Video] Minki dra haar hart op haar mou

Minki van der Westhuizen (Foto: Verskaf)

Minki van der Westhuizen (Foto: Verskaf)

Deur Yolanda Wessels

ʼn Nuwe jaar, en nuwe uitdagings wink vir Minki van der Westhuizen.

Hoewel die plan nooit werklik was om ʼn aanbieder te raak nie, grotendeels omdat sy mal was oor modelwerk en nie geweet het of sy sou kon present nie, is dit presies waar dié borrelende blondekop haar vandag bevind.

“Amor Engelbrecht was jare lank my producer by Pasella en ná sewe jaar op dié stel, het ek ʼn groot liefde vir die televisiebedryf ontwikkel,” vertel sy.

Pasella het Boer soek ʼn vrou gevolg – kykNET beplan reeds aan die tiende seisoen en Minki gaan weer deel van die span wees. Nadat Minki se man, Ernst, einde 2015 uitgetree het as professionele rugbyspeler, het hulle teruggekeer vanaf St. Albans (net buite Londen) na Suid-Afrika en hulle in Stellenbosch gevestig. Hier woon hulle saam met hul twee dogtertjies, Katerien (3) en Elise (2).

“Kort ná ons terugkoms het Elmarie Botha, die vervaardiger van Boer soek ʼn vrou, my genader om te hoor of ek sou belangstel om die program aan te bied. Ek was skrikkerig aan die begin omdat ek nie gewoond was aan werklikheidstelevisie nie.” Kykers se terugvoer was dat sy uitgeknip is vir dié rol.

Minki vertel dat dit ʼn aanpassing en opoffering was om dikwels sonder haar gesin te reis vir opnames, maar dat geen sukses in die lewe maklik en sonder opofferings kom nie. “Ek is opgewonde om wéér deel van die volgende Boer soek ʼn vrou-reeks te wees. Die onderhoude hier is baie intens en vat nogal baie uit jou uit, so ek sien uit na die ligter trant van onderhoude op Kwêla.”

Soos in enige loopbaan, is daar hoogte- en laagtepunte. “Die hoogtepunte vir my op Boer soek ʼn vrou was beslis die mense se reaksie ná seisoen nege se loodsepisode. Ek was op ʼn ongelooflike high en só oorweldig en dankbaar oor almal se positiewe terugvoer. Die laagtepunt was die verlange na my man en dogtertjies wanneer ons op die pad is. Ons gaan so tien dae op ʼn slag weg en ek is baie bly as my kinders kan saamreis. Ek vertel vir hulle Mamma gaan werk by Boer soek ʼn vrou, sodat hulle verstaan. Ek sal beslis nooit ʼn stay-at-home-mamma kan wees nie, ek glo mens moet jouself voortdurend uitdaag en verryk. Dit is gesond vir my en my kindertjies.”

Sy het gelukkig ʼn ongelooflike ondersteuningsnetwerk wat dit vir haar moontlik maak om te reis. “Dit verg baie organising, maar my ma en skoonma help ook baie uit!”

Minki vertel dat sy hard probeer om haarself objektief te hou as aanbieder op Boer soek ʼn vrou. “Ek is iemand wat my emosies wys wanneer iets my raak en dan is dit moeilik om nié empatie te toon nie. Veral wanneer ek baie huis toe verlang, lê die trane maar vlak.”

Nou sprei Minki weer haar vlerke en gelukkig vir ons, is dié sprankelende vrou vanaf 25 Januarie te sien as veldaanbieder op Kwêla. “Dis ʼn wonderlike vooruitsig vir my en boonop is Kwêla een van my gunstelingprogramme waarby ek sélf aanklank vind. Die program is ʼn instelling op Afrikaanse televisie en ek hoop om my eie energie na die program te bring.”

Is daar iets wat vir haar uitstaan? Hierop sê sy kort en kragtig: “Daar staan nie werklik iets vir my uit as aanbieder nie, maar ek hou van die diversiteit van veldaanbieding. Ek is dankbaar dat dié geleentheid my te beurt geval het om nog meer televisiewerk vir kykNET te doen.”

Met haar borrelende persoonlikheid is dit nie altemit nie, kykers kán beslis uitsien na ʼn skitterende reeks waarin Minki ongetwyfeld die aanbieding op Kwêla haar eie sal maak.

Kwêla word Woensdae om 20:30 op kykNET, DStv-kanaal 144, uitgesaai.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

13 Kommentare

jongste oudste gewildste
Snuffels

Pragtig, binne en buite !!!

Rudel du Preez

Baie bly Minki gaan weer Boer soek n vrou aanbied

Marietjie

Sy is nou maar net ‘n awesome vrou.

Ruby

Beslis die beste aanbieder van Boer soek ‘n vrou sover.

Minki bied dit opreg en eerlik aan en dit wys.

Geluk en dankie met jou aanbieding Minki, ek geniet dit baie.

Karoomeisie

Mal oor Boer soek n vrou.Maar dink net daar moet na die reeks kla is mense net op hoogte hou hoe dit gaan met boere wat liefde gevind het. Al is dit ook maande daatna. Al die aanbieders daarvan was sover BAIE OULIKE vroue. Bly vir Hennie en Jakobu !