ʼn Video van werknemers van die St. Augustine Alligator Farm-dieretuin in Florida in die VSA wat poog om ʼn krokodil aan te keer wat uit ʼn voertuig ontsnap het, maak opslae op sosiale media. Die werknemers was besig om die reptiele na ʼn ander ligging te skuif.
In die 12 sekonde lange video kan mens sien hoe personeel van die dieretuin sukkel om die krokodil aan te keer. Die krokodil het die ruit van die voertuig gebreek om te ontsnap.
Die personeel het egter vinnig reageer en seker gemaak dat hulle hom vang voor hy ʼn bedreiging vir die publiek kon inhou. Die dieretuin het die video op sy Facebook-blad gedeel.
“Ons was besig om die krokodille na ʼn ander deel van die dieretuin te skuif … Die dier het die agterste ruit gebreek en vinnig oor die pad gehardloop. Ons span het vinnig reageer om hom weer aan te keer en hom veilig na sy nuwe habitat te neem.”
Volgens die dieretuin was daar “in geen stadium enige gevaar nie, omdat die dier se bek vasgemaak was”.
Die dieretuin het ook die “girl power” geloof, omdat twee van die personeellede wat die reptiel weer aangekeer het, vroulike werknemers is – Karsyn McCreedy (reptiel-bewaarder) en Gen Anderson (algemene kurator).
Die video is deur ʼn persoon genaamd Jessica Stark verfilm. Talle gebruikers het die span geloof vir hul knap hantering van die reptiel.
“Mens kan jou net indink hoe verbaas mense in die motors agter die voertuig was!” het een persoon in die kommentaar geskryf.
First Coast News het ʼn onderhoud gevoer met die twee vroulike werknemers. Anderson het gesê die reptiele is oor ʼn baie kort afstand, slegs ongeveer 160 meter, vervoer.
McCreedy was agter in die voertuig saam met die reptiele. Sy het gesien hoe die dier aanhoudelik “agteruit beweeg”, maar voor sy enigiets kon doen, het hy die ruit uitgestamp.
Dit is een dier/reptiel wat jy nie mee in ‘n skermutseling mee wil betrokke raak nie. Jy sal goed tweede daarvan afkom.