Poultry Bulletin se jongste drie uitgawes straal ‘n regte verbruikersgevoel uit. (Foto: Verskaf)
Die Augustus/September 2021-uitgawe van Poultry Bulletin, die amptelike tydskrif van die Suid-Afrikaanse Pluimveevereniging (SAPV), het pas verskyn. Dit in ʼn tyd waarin die pluimveebedryf sy wonde lek en verliese bereken weens die gewelddadige onluste in Gauteng en KwaZulu-Natal. Wydverspreide uitbrekings van voëlgriep het talle pluimveeboere boonop lamgelê.
Die 115-jarige spreekbuis van die pluimveebedryf het homself vroeër vanjaar as ʼn moderne, toeganklike verbruikerstydskrif vernuwe en pas sy derde tweemaandelikse uitgawe gepubliseer rondom die tema, volhoubaarheid.
Volgens Izaak Breitenbach, hoofbestuurder van SAPV se braaikuikensorganisasie, is besluit om die publikasie vir ʼn groter lesersgroep te omskep wat nou gemik is op boere, verwerkers, besluitnemers, beleidmakers en ander belanghebbendes in die lang pluimveewaardeketting.
“As ʼn bedryf wat ʼn belangrike rol in voedselsekerheid, werkskepping en die groter landbou-BBP speel, verteenwoordig ons baie boere, klein en groot, maar ons spreek ook tot die wye netwerk verwante bedrywe wat saam met ons werk om bekostigbare proteïene vir Suid-Afrika se verbruikers te lewer,” sê Breitenbach.
“Poultry Bulletin lig die belangrikste kwessies uit wat die bedryf raak, en plaas klem op die werk wat gedoen word om die pluimveebedryf se meesterplan te ondersteun. Laasgenoemde poog om die sektor te laat groei, te transformeer en te ondersteun,” sê Melinda Shaw, die redakteur.
“Die volhoubaarheid van die bedryf was nog nooit so belangrik soos nou nie. In die jongste uitgawe kyk ons na toekomsgerigte inisiatiewe oor die hele spektrum en beleggings van miljarde rande wat deur pluimvee-ondernemings gemaak word om mislukte munisipaliteite ondersteun. Verder kyk ons ook na herwinningswenke en aksies wat boere neem om die omgewing te bewaar.”
Poultry Bulletin is nie te koop nie en die gedrukte weergawe word eksklusief aan lede van die SAPV versprei. ʼn Digitale weergawe kan by Poultry Bulletin August / September 2021 afgelaai word.
