ʼn Handvol sjefs by ʼn meesterklas in die boendoes. ʼn Vrou se lyk in die meer. ʼn Privaat speurder wat moet vra: Wie het sy mes in vir wie?
Lake Panic is die perfekte plek vir ʼn verfyningskursus vir ses beroemde sjefs. Só beroemd dat hulle beskerming benodig. ʼn Taak vir Beer Henning – privaat speurder, vryskuttatoeëerder, ʼn man met ʼn verlede. Beer het sy hande vol met:
- Sophia da Silva, ʼn eks-sepiester wat ʼn comeback met haar eie kaal kookboek beplan,
- Otto en Lily Clement, ʼn hardekoejawel en sy muisvaal vrou wat hul reputasie en hul lodge moet red,
- Leopold Lindeque, die kosresensent met die bitter pen,
- Clementine Carolus, tuisnywerheid-tannie, maar net bedags, en
- Alex Fabius, YouTuber en snuiter van formaat.
Wie het ʼn moord opgedis? En wat het die storie van die geheimsinnige meermin van Lake Panic met alles te doen?
Leon van Nierop, die skrywer van meer as 20 romans, is ʼn produktiewe Suid-Afrikaanse skrywer, joernalis, aanbieder, akteur en filmkritikus wat veral bekend is vir die skep en skryf van talle radio- en televisiereekse, waaronder Ballade vir ʼn Enkeling, Stralejakkers en Ratels.
Moord op Lake Panic het pas by Penguin Random House verskyn en dit kos R290 (prys onderworpe aan verandering). Klik hier om die boek aanlyn te koop.
Phyllis Green het met Leon van Nierop oor sy spanningsverhaal gesels. Luister hier na die volledige gesprek wat deur Graffiti Boeke aangebied is:
Graffiti Boeke se aanlyn kuiers en boekbekendstellings word weekliks op Facebook aangebied.
