Corné Kruger
Kinderdrukkies skaterlaggies
Trippel voetjies onder draairokkantjies
Dimpel-arm drukkies
hou my vas, hou my vas
Die groot voël kom haal jou
Vat jou ver oor die see
Sy groot blink vlerke sprei
Donker skadu’s bo-oor my
Pak my in Poppielop
Vat my saam Lolliepop
In “onthou” trek ek saam
Soos die hasie op die maan
Jou skeefkrom reënboogprentjie
Is al wat agterbly
Verkreukel op my yskas
Hou my vas, hou my vas
Draai-draai saam met my
Vir oulaas voor jy gaan
Sing rol op die tolletjie
En klap jou handjies saam
Nog ʼn soen in die nek
Nog een druk voor jy gaan
Pak my in Poppielop
Vat my saam Lolliepop
Onthou my….
Soos die hasie op die maan
- Luister ook hier na ʼn voorlesing van die gedig.
Dr. Sulette Ferreira is ’n berader en navorser in sosiale wetenskappe in private praktyk in Suid-Afrika en spesialiseer in die emosionele uitwerking van emigrasie. Sy skryf:
Hierdie is ʼn gedig vir elke ouer en grootouer met ʼn kind en kleinkind in die buiteland. In my navorsing en terapie het ek die voorreg om baie mense te ontmoet en om vir ʼn kort rukkie in hulle lewensreise te deel. Dit gee my ʼn kykie in hulle leefwêreld: dikwels deur wawyd-oop harte en soms net deur ʼn skrefie-oop venster. Party keer is dit die emigrant self, soms die ouers en soms van die broers en susters. Maar hierdie keer was anders, dit was die grootouer.
“My twee kleinkinders vertrek in September permanent Australië toe. Dis soms so moeilik om jou emosies te verwoord en dit is hoekom ek die gedig geskryf het.”
Ek ontvang hierdie gedig en vir ʼn oomblik het dit gevoel of my wêreld stil staan. Hierdie gedig bevestig wat my navorsing bevind. Dit sê presies wat grootouers emosioneel ervaar en tog so moeilik verwoord.
Corné het toestemming verleen om die kosbare gedig te deel.