Lesersbrief: Hoor hoe raas die stilte…

Audrey Bierman.

Audrey Bierman van Orkney skryf: 

Liewe Afrikaanse kunstenaars,

Ja, ek sê liewe, want meeste van julle is geliefd. Nie deur almal nie, maar steeds voel ek dat daar vir elke genre ‘n plekkie onder die son is.

Dis egter hier waar my huidige probleem begin, by almal se plekkie in die son.

Die Afrikaanse musiekbedryf is nie ‘n maklike een nie. Met die moderne tegnologie en webwerwe wat daarop uit is om die kos uit kunstenaars se monde te haal, kan ek verstaan dat die bedryf besonder kompeterend is. Wat ek egter nie kan verstaan nie, is dat baie kunstenaars blykbaar nie besef dat hulle grootliks die ambassadeurs is wat ons taal (wat elke dag op soveel vlakke aangeval word) moet beskerm en moet help bevorder nie.

Wat gebeur as mense vir jou vertel wat jy mag sing en wat nie? Wat gebeur met ons as publiek as die magte in beheer vir ons begin vertel waarna ons mag luister en wat nie? Wat word van ‘n land of ‘n volk as hul vryheid van spraak van hulle weggeneem word? Ons vat jou taal, ons vat jou keuses en ons vat dít wat van jou maak wie jy is. Ons vat jou identiteit, jou geskiedenis, ons misken jou tot daar van jou niks oorbly, behalwe ‘n vae herinnering van verhale wat eens deur die ouer mense oorgedra is. Soos hulle afsterf, sterf ook alles wat van jou ‘n Afrikaner maak…

Kunstenaarkollega, Steve Hofmeyr, het dit op homself geneem om hierdie tradisies, herinneringe en volkskatte te bewaar, want dis wie hy is. Hy het, net soos elke ander kunstenaar, ‘n platform wat ons as publiek nie het nie. My eerste vraag is egter: Hoekom is jy ‘n kunstenaar in hierdie land? Is dit vir jou net nog ‘n beroep? Doen jy dit vir die roem? Of is daar iewers binne jou ook ‘n begeerte om jou talent in jou taal en aan jou mense oor te dra op só ’n manier dat jy nie net jou talent ontwikkel nie, maar ook iets van waarde aan die mense kan nalaat? Dié mense wat soms, as gevolg van hul alledaagse probleme, smag na ‘n bietjie hoop, iets mooi en ja, selfs om deur jul kuns te kan droom oor dae met mooier en beter horisonne.

Deur op te staan en dit kwyt te raak wat die meeste van ons alledaagse mense sonder platforms elke dag dink, het Steve vir homself die gramskap van die ringkoppe van groot organisasies op die hals gehaal. Hy is geboikot, sleggesê en beswadder deur al wat ‘n liberaal, kunsteraad en hoofstroommedia is. Hulle verlekker hulle daarin om te sien hoe daar van sy konserte gekanselleer word, maar dis al wat hulle kan doen, want hulle het nie rekening gehou met die mense op die grond se lojaliteit en nasietrots nie. Terwyl die organisasies skree: “Kruisig hom!”, nooi die publiek hom weekliks met vol vertonings in hul dorpe en harte in.

Steve Hofmeyr. Foto: Facebook

Ek is bevrees dat daar ‘n groot keerpunt gekom het met die Ghoema-toekennings vroeër vanjaar.  Skape en bokke is in kampe verdeel. Sommige kunstenaars het in solidariteit gestaan met hul kollegas Steve, Bobby, Bok, Jay en Ruhan. Ander het absoluut ‘n saak gehad met die feit dat een organisasie nie net namens die kunstenaars besluit wat gehoor mag word nie, maar sommer ook vir die publiek besluit wat vir hulle aanvaarbaar behoort te wees.

Ek het egter slegte nuus vir Bobby, Bok, Jay en Ruhan. Maar ek is seker Ruhan besef dit ook reeds. Net soos Steve al jare lank geboikot word, word Ruhan ná dese ook onder daardie kam geskeer. Sy liedjie word geboikot op verskeie radiostasies vanweë ʼn kru woord. Die organisasies het namens ons as publiek besluit dat daardie woord absoluut onaanvaarbaar is, maar dat ander liedjies, soos “Souserig”, heeltemal aanvaarbaar is, selfs vir kinders, ten spyte van die suggestiewe aard daarvan.

Jammer Snotkop, dis net ‘n voorbeeld.

My vraag aan elke kunstenaar ná hierdie hele lang relaas is: Hoe lank voordat jy gesê word hoe jy jou talent mag aanwend? Hoe lank voordat jy geboikot word omdat jy op die een of ander organisasie met ‘n agenda se tone getrap het?

Terwyl ek en ‘n vriendin sit en gesels, wonder ek waarom nie een enkele kunstenaar al opgestaan het en vir Steve dankie gesê het, dat hy van die Afrikaans is Groot se Kaapstad-vertonings onttrek het nie? Is die ander kunstenaars werklik so bang of so arrogant dat hulle dink dis hulle reg?

Net soos wat politici nooit moet vergeet wie eintlik hul salaris betaal nie, behoort kunstenaars ook nie te vergeet wie die mense is wat hulle dra nie. Moet ook nooit so groot word in jou eie klein wêreld dat jy voel jy is onaantasbaar nie.

Ek sal nie my asem ophou nie, maar ek hoop tog dat ek iewers ‘n antwoord sal lees dat een of meer kunstenaar sal opstaan en sê, dankie kollega, dat jy aan ons ook gedink het.

Stuur vir ons jou brief, met ’n maksimum van 500 woorde, na , dan oorweeg ons dit vir publikasie.
Hierdie rubriek is ’n lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

33 Kommentare

Ag nee rerig ·

Hierdi landji van ons!! Hou asb politiek en musiek uitmekaar. Word n politikus as jy wil, of sing as jy wil. Moet asb ni di 2 meng… dit bring verdeeldheid in iets wat meeste net vir ontspanning wil gebruik. Ek wil musiek hoor – sonder om aan politiek te dink. Ons leef moeilik genoeg – musiek is juis ontvlugting! Ek wil na n musiekkonsert gaan om te geniet. As ek na n politieke vergadering wou gaan, sou ek. Di 2 moenie meng nie! Dis vandat dit gemeng word wat als bietjie suid gaan. Die sangers – hulle sing eerstens om n bestaan te maak. Brood op die tafel. Hul gesinne kom eerste. Dis n wérk. Nou verloor hulle inkomste omdat ander sangers politiek oral insleep. Dis ook nie regverdig nie. As ek n sanger was – en moes kies tussen inkomste en saam-met-wie-ookal-wil-politiek-inbring – sorry. My gesin kom eerste. Of gaan jy maar jou paaiemente skiep, want dis belangriker om politiek te sing? Ek dink steve leef nou sy keuse. En niemand kan ander sangers verkwalik as hulle hul gesinne 1e sit.

Posduif ·

@ “Ag nee rerig” – Kan jy eerlik se dat wanneer jy “Die Land” van Steve en sy vriende luister dit nie met jou praat nie? Waar dink jy is daardie lied gebore? In die hart van die kunstenaar waar die Afrikaner bloed deur sy are bruis (of dalk sal jy argumenteer dat hulle sing dit wat hulle weet sal verkoop?). Hoe dit ookal sy, daar is liedjies wat uit diepte gebore is, ‘n diepte wat deel van die kunstenaar se wese opmaak. Luister na Riana Nel se “Hou die Hemel oop” en die storie daaragter.
Dit wat die hart van vol is loop die mond van oor!!! Dis twee kante van dieselfde munstuk en kan nie geskei word nie. Laat die kunstenaars toe om hulle uit te druk soos dit op hulle hart is. Ondersteun die wat jy wil en gun die ander hulle platvorm, selfs al is daar ‘n politieke kant daaraan.
Die politici is ook kunstenaars en lewer heelwat vermaak. Kyk gerus ‘n parlement-sitting met die rooi brigade as deelnemers. Jy kan nie stry nie, dis goeie vermaak, al is dit soms hartseer as jy na die werklikheid daaragter kyk. Die punt is. Dit lyk my politiek en vermaak kan tog saamgaan. Die politici het dit vervolmaak.
Sela

Siener ·

My geld word spandeer op kusternaars wat opstaan vir homself en sy ondersteuners op beide vermaaklikheids en politieke vlak. Ek het kunstenaars wat draadsitters is ook afgeskryf en sal geen meer cd’s van hulle koop nie. Die organisasies wat hulle boikot sal deur my ook geboikot word. Dankie aan al die mense wat soos ek dink en doen. Steve, Bok, Bobby, Jay en Ruhan is ons hero’s.

Kiepersol ·

Ek stem heeltemal met jou saam. Steve meng politiek met musiek, want hy het lank reeds besef dis hoe hy die volkie aan sy kant kan kry en dit gee dan aanleiding tot goeie bywoning van konserte en verkope van sy boeke en CD’s.
Ander gerespekteerde kunstenaars gebruik net hul sang om ‘n inkomste te genereer.
Steve moet koud slaap op die bed wat hy vir homself opmaak.
Moenie ander sangers kruisig omdat hulle hou by dit waaroor dit eintlik gaan : musiek.
Te veel kunstenaars wil op die souswa spring deur musiek met politiek te meng menende dat dit hul loopbane ‘n hupstoot sal gee.
Gee my eerder ‘n sanger wat sing en musiek maak sonder opportunistiese politiekery.

Tresia ·

Ag Nee Rerig sodra jy geleer spel het sal ek weer jou kommentaar lees tot dan is jou mening nie van toepassing nie

Judge Dredd ·

….maar ons hou tog so van die celebrities met hul liberale sieninge….

T ·

Jy het dit heeltemal verkeerd. Dis nie Steve wat die politiek uithaal nie – dis politisie wat die sanger en Afrikaanse mense teiken. Steve kom net vir Afrikaners op! Iemand moet begin rug styf maak teen die geboelie!! Wakker word!

Carel ·

As julle Steve se familie geskiedenis ken sal jy sien dat sy oupa al geveg het vir die afrikaner en Steve doen so voort
As ons net meer Steves gehad het sou SA n beter plek gewees het. Ek is baie trots op hom en sal hom altyd ondersteun

Tilly ·

Om mee te begin, wil ek DANKIE se vir die berig.

Afrikaners se so maklik die regering en die land sleg, maar sodra daar iemand is wat wil opstaan vir ons (Steve), dan het hulle baie om te se, vir daardie mense wil ek net se, word tog wakker.

Ek bly vir n land tyd nie meer in SA nie, maar het wel nog my familie en friende daar en ek ondersteun alles wat sekere Afrikaanse mense probeer doen vir ons as n volk.

Rubber ·

Kom on herinner ons weereens dis net Afrikaners en Afrikaans wat aangeval word. Dankie Steve jy is ‘n ware Afrikaner en die geskiedenis gaan jou so onthou.

Bella ·

Steve staan vir sy eie mense. Van die ander Afrikaanse sangers verkoop hulle siele vir geld. Hulle sal saam met wie ookal optree as dit hulle sakke kan vol maak.
Ons word so vertrap en verneder en tog vat ons dit.
Ek staan by die sangers wat by my en ons mense staan.

Jerry ·

Audrey, jy skryf so mooi en dan eweskielik vind jy regverdiging uit jou mooi skrywe om die ander kunstenaars te dreig wie net kunstenaars wil wees en niks met Steve en sy politieke aktivisme uit te waai wil he nie. Bo en behalwe dit wat jy reken wat Steve vir musiek in afrikaans beteken het, seker nog beteken, leef jy egter in ontkenning van die skade van n verskerpte aanslag deur die linkse liberales, n aanslag wat Steve se politieke uitsprake en uitlokking tot boikotte en uitsluiting oor die afrikaner en kunstenaars gebring het. Seer sekerlik is jy tog seker ook daarvan bewus dat Steve deel uitmaak van Solidariteit se politieke agenda vir die isolasie van afrikaans en sangers by Solidariteit vir die bou van n Solidariteit sakeryk. Nou Audrey luister nou mooi vir my, nie alle afrikaners en kunstenaars is politieke aktiviste nie en nie almal is naief om aktiviste wat die regte dinge verkeerd doen slaafs na te volg of te ondersteun nie.

JG ·

@ Jerry…en net daar sit jy die hele pot mis ou bul. Steve is nie die bedreiging hier nie, hy staan net op teen wat die liberale media aan ons wil voorhou. Jy is so verblind deur jou misplaaste “haat” teen alles en almal wat JY reken aktiviste is. Hoekom val jy nie die Lesufi’s en Nzimandi’s van die land aan nie…hulle wat spesifiek daarop uit is om Afrikaans tot niet te maak ? Jy is seker bank jy word geteiken, of hoe ?

EAN ·

Inderdaad roep die stilte! ‘n Vragie? Is die kunste in al sy vorme tog nie ‘n Profeet van die realiteit nie? Liedere/gedigte/dramas/kuns sketse ens probeer tog die huidige omstandighede interpreter vanuit die besondere kunstenaar se eie skeppingsvermoeë. Ons kan ongelukkig nie ons leef wêreld in kompartemente leef nie-alles vorm ‘n geheel. Dankie Steve en ander, wat dit so demonstreer en leef. Vir die ander – Julle stilte roep uit!!!

VB ·

AG NEE RERIG, regtig? Ons is verby die punt waar ons ons koppe in die sand kan druk. Ons word verdruk. En soos die skrywer se, ons word deur ander met hul eie agendas gese wat ons mag en nie mag luister nie. Steve sing Die Stem, vir Afrikaanse mense, toe kom ver-politiekery ander mense dit. Nie Steve nie. Hy staan nie daarvoor en ‘dans’ en sing soos EFF: ‘kill the boer’. Hy staan op vir ons taal en geskiedenis en REGTE. Dis nie politiek nie, en as hy opstaan vir sy regte deur sy musiek, so what, mense doen dit. As ons almal stilbly gaan niks ooit regkom nie. Is bv die sing van DIE STEM verkeerd? Dis dan Afrikaanse gehore wat daarna luister. As hy ‘n grap maak oor ‘politiek’ wat daarvan, mense doen dit. Dis nie politiek nie! Hy’s flippen skerp, snaaks en ‘n goeie sanger en ‘n patriot vir sy mense. As Cyril ‘sy volk’ het mag ons ook seker ‘ons volk’ he. Ek stem met die skrywer, waar is die ander kunstenaars se dankie, maar ek wil ook weet, waarom staan jul nie ook soos een man/vrou op en SING VIR JUL TAAL want ons taal en kultuur is dit werd om voor te veg? Toeskouers sal steeds betaal om jul te sien, ek vra nie dat jul ook nou ‘politiek’ toepas nie, moet net nie nou jul rue op mense soos Steve draai nie.

Thea Bothma ·

kon dit beter gestel het, briljante stukkie leesstof
net jammer nie almal kan lees nie

Tweetie ·

Ek haal my hoed af vir Steve, en ander soos hy wat die guts het om op te staan vir waarin hy glo. Baie voel ook soos hy, maar is te bang om iets in die openbaar te uiter, want dan word jy openlik geteiken.

patriot ·

Trots op jou Steve! Goeie vraag, WAAR is die kunstenaars wat net soos hy voel? As almal opstaan soos Steve en `n punt maak, kan die libs en regering niks maak nie. Los ons Afrikaner kultuur in vrede!

Steve Fan ·

Steve is 1 vd min kunstenaars wie murg in sy pype het en vir ons boerevolk opstaan. Dankie Steve. Hou aan met dit waarin jy glo, jy het nog baie ondersteuners en sal nog bykry.

Alet Klaassen ·

Die skrywer slaan die spyker op die kop. Dis hoe die mense om my ook voel. In ons land is die politiek se invloed in alles wat ons beleef. Wie is dan nou veronderstel om op te staan vir ons taal en ons mense? Dankie tog vir iemand soos Steve wat dit op die ordentlikste manier denkbaar doen. Dan sing hy ook nog fantasties.

Sann ·

Ek haal my hoed af vir jou, Audrey. Jy kyk met wysheid na dit wat gebeur. Jy word beslis nie verblind deur die valsheid waarmee politieke agendas vermom word as “nasiebou” en menseregte nie. As die regering regtig sy plig gedoen het, sou sangers net kon sing en boere net kon boer. Maar nou moet ons eers onsself beveilig, en óns regte regverdig.

wilma ·

En daar kry die gewraakte lied “Die Land” ‘n Aitsa-toekenning. Welgedaan aan almal.

Jerry ·

Hoe staan jy op vir afrikaans wanneer jy veralgemeende uitsprake maak deur te se dat swartmense is die argitekte van apartheid? Dit is verdelende politiek wat absoluut niks met afrikaans uit te waai het nie, maar wat Afrikaners die onguns op die hals gehaal het, vandaar die gewraakte en verskerpte aanslag teen afrikaans om daardeur afrikaners by te kom, nie net vir Steve nie, vir die afrikaners en dit is presies wat Steve en Solidariteit/Afriforum ten doel het. Om die afrikaner te isoleer by Solidariteit/Afriforum projekte. Nie alle afrikaners val vir die uitsluiting en selfopgelegde isolasie wat Steve en sy kamerade “stage” nie. Daarom ook dat Sonja by die Aitsa toekenning in haar toespraak gese het dat jy kan protesteer terwyl jy brue bou, nie brue afbreek nie!

Stephan de S ·

@ Jerry, ek weet nie presies wat Steve gesê het nie maar dis hoog tyd dat jy verstaan dat afsonderlikheid nooit sou bestaan het as Afrika suid vd ewenaar die alfabet en die wiel gehad het in 1652 toe V Riebeeck hier geland het. As gevolg vd totale isolasie v Suider-Afrika vd ontwikkeling in die res vd wêreld het daar noodwendig differensiasie ontstaan EN IN HIERDIE SIN HET DIE AFRIKA-MENSE BYGEDRA TOT APARTHEID. Lg het beslis nie in ’48 begin nie. Dit sal waardeer word as jy jou siniese kommentaar verminder en jou verwarring v versoening met oorgawe sal stop. Dis verbasend dat èèn man kan dink dat hy n oplossing vir alle probleme het.

Henry ·

Ou Jerry se kommintare is tiperend van ‘n beterweterige siel wat op bykans daaglikse wyse hulle na platforms soos MM wend. Hier kan hy lustig en mahala – gratis – kekkel en kraai, terwyl hy ons dommes inlig oor al die ‘waarhede’ waarvan ons mos niks weet nie.
Amper soos daai piete wat destyds in Kemptonpark die droewe land voetstoots aan die huidige regime weg gegee het, terwyl hulle vir ons probeer oortuig het dat perdekuttels eintlik vye is.

Nogal baie soos ou Jerry wat op sy manier ook met die kuttels en vye aan’t smous is.

:-)

Siener ·

Ou Jerry hou asb op met jou eensydige komitaar. Ons is hier vir Afrikaans en Afrikaans alleen. Jy skep verdeeltheid met jou copy en paste. Daar is baie ander ANC en EFF websites waar jy jou heeltemal kan uitleef met jou politieke stellings.

WDH ·

As ek die komentaar so lees sien ek nie n toekoms vir afrikaans in hierdie land nie tiepies “white privilege ” wat mekaar eeder sal aanval as by staan ……….. ja nee AFRIKAANS HET LANKAL SY … GESIEN ELKE MAN VIR HOM SELF …LANKAL NIE MEER TROTS OP MY KAMA HERITAGE NIE want niemand praat daar oor nie en mag nie daar voor baklei nie….. Al wat ons blankes goed voor is is suip vuiste swaai mekaar sleg se ooo en die speling wie gee om ons taal het gesterf nog voor ek gebore was….. lets ban our own language and get over it !!!

Vanessa Attwell ·

Wow, wow Audrey Bierman. Uitstekend gestel. Dankie Maroelamedia dat julle haar stywe gepubliseer het.
Diegene wie Steve en sy familie nie persoonlik ken nie, sy bydraes tot liefdadigheid, studielenings en om die vergete kunstenaars weer publisiteit te gee, moet eers selfondersoek instel. Wat doen jy? Ek is skuldig daaraan, ek sit in Australia.

DOORTJIE ·

gelukkig is daar belangriker dinge, vir my, in die lewe, as om te veg oor politiek, kunstenaars en afrikaans, wat GEEN EWIGHEIDSWAARDE hoegenaamd het nie en mens nie eendag in die hemel gaan bring!

Santie Hain ·

Well done Audrey! So bly iemand praat oor iets wat op so baie mense se harte druk oor ander kunstenaars wat net op die draad bly sit en hulle hande in onskuld was. Dit grief my net so.

Maureen ·

Ek kan nie dink dat ons as gewone Afrikaans sprekende Afrikaners mekaar aanval oor iets soos Steve Hofmeyr nie. Nie net is hy n uitstekende skrywer, digter, komponis nie, maar hy veg vir dit waarin hy glo, vir dit wat hom as mens gevorm het! Wees eerder dankbaar dat daar iemand is wat ons wil help in ons taal!!! Viva Steve!!

Mev Hugo ·

Dankie Steve vir jare se opofferings vir jou nasie! En elkeen wat saam jou staan. Ek weet dis nie maklik om al die ongepaste kritiek te verwerk nie, veral as dit so sinneloos is nie. Maar nogtans vat jy als wat na jou kant toe gegooi word en sit dit agter jou. Jou Geloof en standvastigheid sal eendag die beste beloon word. Ons bid vir jou en jou gesin vir Voorspoed en krag om te kan wees wat God vir jou beplan het.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.