Die ANC se nuwe tuislande

Prof. Hans du Plessis. (Foto: Maroela Media/Janie Monsieur)

Dankie, meneer Lesufi, u uitsprake oor Afrikaans, Afrikaanse universiteite en skole bevestig maar net wat ons lankal weet: die ANC vernietig inheemse tale ter wille van ʼn eentalige Suid-Afrika, en die hegemonie van Engels, soos in Namibië. En die maklikste taalgeweer om mee te skiet, is Afrikaans –die oorbeklemtoning van sy politieke verlede en die miskenning van sy nierassige Afrikaherkoms en wese.

Die gevolg is dat daar oraloor nuwe linguistiese tuislande soos paddastoele opskiet, en dit net omdat Afrikaans opsigtelik vir die owerhede ʼn bedreiging is. ʼn Mens val immers net iets of iemand aan wat jou bedreig, jy vernietig net ʼn skool of ʼn universiteit as dit vir jou na gevaar begin lyk.

Miskien het te veel van ons politici oor die Asteke nagelees. Dit is moontlik dat ʼn kultuurgemeenskap van sy identiteit beroof kan word. Die Asteekse keiser Itzcoatl het in die middel van die vyftiende eeu, nadat hy die oorwinning oor sy vyand behaal het, opdrag gegee dat alle monumente, boeke of kunswerke van die verowerde gemeenskap vernietig moes word, want hy wil die bestaande tradisie met ʼn nuwe vervang. Vernietig die taal van ʼn groep sodat jy dit met ʼn nuwe kan vervang. Al beteken dit dat jy al die ander inheemse tale vernietig sodat dit met Engels vervang kan word.

Die kriminalisering van die Afrikaanse geskiedenis en die Afrikaanse taal het egter net mooi die teenoorgestelde uitwerking: dit dwing gemeenskappe in intellektuele tuislande in, veral linguistiese tuislande in die vorm van privaat onderwysinrigtings.

Ek sien dit die afgelope twee weke ook in Namibië waar ʼn mens oral privaat Afrikaanse skole kry. In Namibië het ʼn mens dit egter verwag, want Swapo was van die begin af eerlik: Namibië is amptelik ʼn eentalig Engelse land. Die vraag is nie of dit met die taalwerklikheid verband hou nie, maar die land sal Engels word.

In die geval van Suid-Afrika lieg politici van die begin af vir ons oor meertaligheid, want dit is duidelik dat ons op pad is na ʼn eentalig Engelse land. Gʼn wonder ons universiteite lieg deur hul halfgeleerde nekke vir almal oor hul sogenaamde beleid van veeltaligheid nie.

Een ding het mnr. Panyaza Lesufi, LUR vir Onderwys in Gauteng, duidelik uitgespel: daar is nie meer ʼn Afrikaanse universiteit nie, daarom is Afrikaanse hoërskole nie meer nodig nie. Die LUR is nie baie oorspronklik nie, want dit het ek lankal gesê. Wat hy nie bygesê het nie, is natuurlik dat as daar nie Afrikaanse hoërskole is nie, is Afrikaanse laerskole mos nie nodig nie en sonder laerskole is Afrikaanse kleuterskole sinloos. Die argument is nie moeilik om te vog nie: Afrikaans is onnodig – om van die ander inheemse tale nie eens te praat nie!

Gelukkig het ons owerhede nog nooit van die ou Britse lords Nelson en Milner gehoor nie. Hulle het ook gedog hulle verbied Afrikaans, toe floreer die taal …

Moet dit nou net vir die politici sê nie, maar as jy ʼn taal wil red, verbied dit!

Ek het nou hier by ons en in Namibië baie Afrikaanse skole besoek, maar nêrens het ek ʼn enkele Afrikaanse skool vir kleinbasies gekry nie. Al wat gebeur, is dat die Lesufi’s onder ons daaraan skuldig is dat hul kortsigtigheid die stig van linguistiese tuislande stimuleer. Daarom het die afskaffing van die ou kunsterade ʼn ontploffing van Afrikaanse kunstefeeste veroorsaak; daarom steun ek ʼn Akademia en daarom agiteer ek dat ons met Afrikaanse geld die Potchefstroomkampus van die NWU koop … Daarom floreer die Afrikaanse boek en die Afrikaanse musiek. Intellektuele tuislande.

En as Afrikaans wit was, sou dit wit tuislande wees, maar gelukkig het Afrikaans Europa lankal ontgroei en dit speel, gesels, sing en onderrig oor alle grense wat die politiek kan uitdink.

Dankie, meneer Lesufi, dat ons Suid-Afrikaners wat nie Engels is nie, nou ook die ANC se waarheid weet.