Wit mense in Suid-Afrika skrikwekkend minder

lego-skare-mense-bevolking

Foto: Pixabay.com

Deur Marianne Breytenbach

Dr. Frans Cronje van die Suid-Afrikaanse Instituut vir Rasseverhoudinge is verlede jaar deur ʼn joernalis genader oor die toekoms van wit mense in Suid-Afrika. Sy antwoord was dat wit mense teen die middel van hierdie eeu bes moontlik uit die bevolking sal verdwyn het.

Cronje was jare gelede deel van ʼn span wat die toekoms van die Suid-Afrikaanse bevolking bestudeer het. Omdat daar ʼn aantal huidige en historiese vrae oor die akkuraatheid van Suid-Afrikaanse bevolkingsyfers is, het die span noukeurig na die ouderdomstruktuur van die bevolking gekyk.

Een van die bevindings was dat daar meer wit mense in die ouderdomsgroep 50 tot 59 jaar was as mense van 20 tot 29 jaar. Oor die hele ouderdomsgroep, 20 tot 40 jaar, is daar bewyse van wit mense wat die land verlaat het. Die span het dié getal op etlike honderde duisende geskat.

Daar is ook bevind dat hierdie wit mense Suid-Afrika ná 1994 verlaat het. Die span het dit geweet omdat dié jongmense se ouers nog in die data was, maar dat die kinders voor 1994 nog te jonk sou wees om sonder hul ouers te emigreer.

Die span het ook opgemerk dat daar ʼn skerp afname is in die getal wit kinders wat in Suid-Afrika gebore word. Dit is nie net die afname wat ʼn mens sou verwag van ʼn voorspoediger middelklasgroep wat minder kinders kry nie. Die getal wit kinders wat in Suid-Afrika gebore word, is ʼn weerspieëling van die afname in die getal wit mense in die ouderdomsgroep 20 tot 40 jaar.

Die feit dat baie jong wit mense buite Suid-Afrika kinders kry, suggereer dat hulle die land permanent verlaat het. Volgens Cronje is dit onwaarskynlik dat wit mense na Suid-Afrika sal terugkeer nadat hul kinders in die buiteland gebore is.

Die navorsingspan het voorspel dat Suid-Afrika se wit bevolking al ouer sal word en mettertyd tot byna niks sal verminder. Daar is beraam dat 40% van die huidige wit bevolking in die volgende drie dekades weens ouderdom of siekte kan sterf. Namate wêreldwye ekonomiese toestande verbeter, sal dit vir jong wit mense makliker word om hul lewens in die buiteland te lei – veral as die regering voortgaan met dreigemente teen eiendomsregte en die afdwinging van rassekwotas in die sakesektor en werkplek. Geboortesyfers van wit mense is te laag om te vergoed vir mense wat sterf of emigreer.

Die slotsom is dat ʼn aansienlike vermindering in die wit bevolking voorsien word.

Terwyl wit bevolkingsyfers afneem, sal die breër Suid-Afrikaanse bevolking waarskynlik toeneem. In 1994 was die beraamde bevolking in Suid-Afrika 39 miljoen mense. Die syfer het met 40% toegeneem tot 56 miljoen vandag.

Wit mense vorm tans ʼn beraamde 8% van die totale Suid-Afrikaanse bevolking. Veroudering en toenemende emigrasie kan die persentasie tot tussen 1% en 3% laat daal.

Bloot wat die ekonomie betref, sal die implikasie hiervan ingrypend wees.

  • Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
Liberaal

Die liberaal demokratiese plan werk goed.

Eish

Net soos die wit op die vlag, n dun wit strepie.

waarheid

Hierdie mense wat die land verlaat het gaan oor ‘n paar jaar weer terugkom wanneer dit sleg gaan oorsee met die immigrante daar – en dit gaan kom. Dalk oor 10 jaar of so – maar dit gaan kom.

Theresa

Veroudering, emigrasie en moord. Dit beskryf nie vermindering meer volledig.

honourable member

En en teen die tempo wat wittes uitgemoor word raak ons baie vinnig minder. Ons is nog voor die middle van die eeu uitgewis.