Entrepreneur leer grootste lesse by gestremde mense

Beatus handgemaakte leerhandsakke (Foto: Verskaf)

Wanneer Nadia Gouws, ʼn finalejaar-onderwysstudent by die Universiteit van die Vrystaat se Bloemfonteinkampus, terugdink aan die afgelope vier jaar sedert sy haar eie onderneming begin het, is dit nie sakevaardighede of -lesse wat die grootste invloed op haar lewe gehad het nie, maar eerder die wyshede wat sy by haar gestremde werknemers geleer het.

Gouws vertel dat een van haar werkers, Jan Bam, wat onlangs weens Covid-19 dood is, se dankbaarheid en vrygewigheid altyd opvallend was.

“Ek onthou hoe Jan aan die einde van verlede jaar ʼn geskenkpakkie ontvang het, maar in plaas daarvan dat hy dit vir homself hou, het hy dit vir ons kom uitdeel,” onthou Gouws. Haar ma, Diasa, en pa, Renier, het aanvanklik gereeld net ʼn handjie bygesit wanneer Gouws nauurs gewedywer het om bestellings af te handel. Gouws werk soms steeds nauurs, maar omdat die onderneming aansienlik gegroei het, is beide haar ouers nou voltyds betrokke.

Beatus handgemaakte leerbelde. (Foto: Verskaf)

“Ag, dit is heerlik! My ouers kom sit gewoonlik by my waar ek werk en dan word dit eintlik een groot geselligheid,” sê Gouws.

Nog ʼn gestremde werker, Flip Nel, wat ook intussen oorlede is, het net so ʼn blywende indruk op haar gemaak. Gouws vertel dat Nel se menswees en aansteeklike lewenslus haar geïnspireer het om haar toekomsdrome uit te leef en ander gestremde mense te help en te leer om hulle volle potensiaal te bereik.

Maroela Media het vroeër berig dat sy in 2017 haar eie onderneming, Beatus (uitgespreek as “Bie –ah-tis”), ʼn egte leersakonderneming wat werk vir gestremde mense skep, begin het. Die behoefte het ontstaan toe Gouws en haar ma nie daarin kon slaag om die perfekte handsak in die winkels op te spoor nie.

Van links na regs: Troy Jansen, Charles Marais en Nadia Gouws. Jansen en Marais is tans deel van die Beatus-span. (Foto: Verskaf)

Gouws se oupa het jare gelede ʼn beroerte gehad, en sy glo dit het haar liefde om met gestremde mense te werk ook aangevuur.

“My oupa het ʼn beroerte gehad toe ek nog klein was en ek het hom nooit voor die beroerte geken nie. Maar ek het elke vakansie plaas toe gegaan en ek en hy het verskriklik lekker gesels. So, ek dink dit is waar my liefde vir gestremde mense ontstaan het.”

Dié 21-jarige entrepreneur sê sy werk enige dag met gestremde mense. Hulle is hardwerkend en dit is ongelooflik om te sien hoe elkeen van haar werknemers binne ʼn maand of twee groei. Dit kom egter nie sonder sy uitdagings nie.

“Dit verg geduld, kreatiwiteit en begrip. Omdat hulle nie lank op een ding kan fokus nie, moes ek aan maniere dink om hulle konsentrasie te behou. Dan het ek partykeer sommer rympies gekry om hulle te leer.”

Beatus handgemaakte beenbedekkings, oftewel “kamaste”. (Foto: Verskaf)

Hoewel die pandemie hulle tydelik gekortwiek het, het Gouws nie op haar laat wag om die sakeonderneming te laat voortgaan nie. Tydens die algehele afsonderingstydperk het sy vir ʼn wyle saam met haar ma maskers gemaak en later nuwe produkte vir Beatus ontwerp.

Alle leerprodukte word met die hand gemaak, wat beteken dat dit sterker as masjiengemaakte produkte is.

Gouws en haar span is nou ook ingerig om gravering te doen en korporatiewe geskenke soos sleutelhouers, pennesakkies, drupmatjies (coasters), voorskote, hoede en vellies, asook troubykomstighede soos gastegeskenke, dasse en gordels, te vervaardig.

Gouws het ook besluit om Beatus se aanlyn winkel te sluit en voortaan bestellings op Facebook en WhatsApp te hanteer.

Beatus werk nou saam met Solidariteit Helpende Hand se Vrystaatstreek en beoog om in die toekoms nog talle inisiatiewe aan te pak en só terug te ploeg in die gemeenskap.

  • Het jy geweet? Maroela Media se vellies word in samewerking met Beatus Leerprodukte en Bata, een van Suid-Afrika se mees gesogte skoenvervaardigers, gemaak. Jy kan nou ʼn regte-egte leervellie van net die beste gehalte in Maroela Media se aanlyn winkel, Die Koöperasie, koop. Elke skoen word subtiel gebrandmerk met Maroela se boom-embleem sodat jy diep Afrikaanse spore kan trap oral waar jy gaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.