[Foto’s] Agtjarige red hond uit puttoilet

Die hond, Sue, soos die skuiling haar gedoop het, kort nog ʼn huis. Haar babatjie, Nitro, is reeds aangeneem. Foto: Verskaf

Jamie Faul, ʼn agtjarige seun van Komatipoort in Mpumalanga, het vroeg vanjaar ʼn hond uit ʼn puttoilet in Tonga, ʼn informele nedersetting naby Komatipoort gered.

Jamie se ma, Irene, sê hulle help gereeld diere in die omgewing aangesien Komatipoort nie ʼn DBV het nie. “Barberton se DBV help met sommige van ons klagtes, maar daar is soveel diere in nood, hulle kom nie altyd by ons uit nie.”

Irene het eers ander organisasies probeer bel vir hulp toe hulle van die hond in Tonga hoor, maar kon niemand in die hande kry nie. Sy sê die hond was in ʼn sementkamer onder die grond wat mense in Tonga as ʼn toilet gebruik. “Blykbaar het die hond daar ingehardloop nadat sy met ander honde in die area baklei het. Die hond het ook ʼn kleintjie gehad wat by die gat sit en tjank het.”

Volgens Irene kon hulle nie by die hond uitkom nie omdat die hond vreeslik bang was. Hulle het ʼn stuk hoender in die gat gegooi om die hond nader te lok, maar sy wou nie beweeg nie. Hulle moes naderhand een van die toilette uitbreek, maar hulle kon steeds nie deur die gat kom nie.

“Ons het vir Jamie met ʼn klomp sakke toegebind, handskoene aangetrek en hom met ʼn tou vasgebind en vir hom ʼn lig gegee. Hy het eers gesukkel om die tou om die hond vas te kry omdat die hond nat en glad was – sy was reeds vir twee dae in die gat, maar Jamie het dit toe reggekry.”

Jamie sê hy was nie eintlik bang gewees nie, maar hy het lig geloop vir al die spinnekoppe. “Ek wou net die hond kry en seker maak sy is oukei.”

Irene sê hulle het vir Jamie en die hond probeer skoon skrop nadat hulle uit die gat gekom het, maar dat hulle dae later steeds bly stink het. “Die hond en haar kleintjie het die aand by ons gebly, maar die volgende dag het ons haar na ʼn skuiling in Nelspruit geneem.”

Dis blykbaar nie die eerste keer wat Jamie ʼn dier red nie en Irene sê hulle help gereeld diere, veral honde en katte wat in nood is. “Daar is nie ander mense om te help nie – dis hoekom ons dit doen. Jamie is mal daaroor, hy is vreeslik lief vir diere en die natuur.”