Helpende Hand se Ons Winkels vier Februarie, ook bekend as die maand van liefde, deur die onderskeie winkels vrolik met rooi en wit op te kikker. (Foto verskaf)
Deur Marné du Plessis, hoof van bemarking by die Ons Winkel-groep.
Vir baie mense is die gedagte aan werk bloot ʼn manier om ʼn inkomste te verdien wat ʼn noodsaaklike deel van die lewe is wat vervul moet word om finansiële stabiliteit te verseker. Vir ander is werk egter veel meer as net ʼn plig – dit is ʼn roeping, ʼn passie, ʼn bron van vreugde en vervulling. Solidariteit Helpende Hand se Ons Winkel is ʼn goeie voorbeeld hiervan. In elkeen van die 127 Ons Winkels oor die land heen is daar ʼn winkeleienaar met personeel met ʼn passie vir hul werk en gemeenskap.
Diegene wat die voorreg het om ʼn ware liefde vir hul werk te ervaar, ken diepe voldoening wat nie net van ʼn salarisstrokie kom nie, maar weet dat daar iets dieper en meer sinvol is. Hierdie mense sien hul werk as ʼn roeping – iets wat hulle nie net moet doen nie, maar wat hulle graag wil doen, iets wat ʼn integrale deel van hul identiteit en lewensdoel is.
Elke winkeleienaar wat ʼn Ons Winkel bedryf of hand opsteek om ʼn Ons Winkel te bedryf, dra hierdie waarde baie na aan die hart. Om geskenkte items te ontvang, nuwe voorraad uit te pak en kliëntediens te lewer, speel elkeen ʼn belangrike rol, maar die gemeenskaplike element is die diepe liefde en toewyding tot die werk self.
(Foto verskaf)
ʼn Liefde vir jou roeping bring ook ʼn gevoel van betekenis en doel in jou lewe. Dit gee jou ʼn gevoel van identiteit en trots, en laat jou voel dat jou lewe ʼn impak het, dat jy iets waardevols bydra. Dit geld nie net vir elke Ons Winkel-eienaar nie, maar ook vir elke Solidariteit Helpende Hand-ondersteuner en vrywilliger.
Maar vir diegene wat die roeping van hul hart volg, is die belonings onmeetbaar. Die vreugde van ʼn liefde vir jou roeping is nie net vir jouself nie, dit straal ook uit na ander – jou passie en toewyding is aansteeklik, en dit kan ʼn positiewe invloed hê op die mense om jou en in jou gemeenskap en selfs op die wêreld as geheel.
In ʼn wêreld waar werk dikwels as ʼn las beskou word, is ʼn liefde vir jou roeping ʼn kosbare juweel wat gekoester moet word. Dit is ʼn herinnering dat werk nie net ʼn noodsaaklike plig is nie, maar ʼn bron van vreugde, vervulling en betekenis – ʼn bron van lewe en liefde.
Ons Winkel is Solidariteit Helpende Hand se winkels vir tweedehandse skenkings en daar is binnekort meer as 127 winkels landwyd waar jy vir jou en die hele gesin winskopies kan aankoop. Dit strek van meubels, kombuisware, sporttoerusting, boeke, elektriese ware, klere en linne tot soveel meer.
- Om meer uit te vind oor die Ons Winkel-groep of om jou naaste Ons Winkel op te spoor, besoek gerus ons webwerf by Onswinkel.co.za.
