Kaapse kweker floreer, van blombeddings tot beddegoed

Adene Nieuwoudt. (Foto: Verskaf.)

Adene Nieuwoudt het nooit gedink die klein bossie blomme wat sy ses jaar terug in haar agterplaas geplant het, sou tot ʼn suksesvolle sakeonderneming én ʼn reeks huisware by Mr Price lei nie.

Nieuwoudt het geen ervaring met boerdery of kwekery gehad toe sy destyds met haar blommeonderneming, Adene’s Farm Flowers, begin het nie.

Sy het haar loopbaan as ʼn modeaankoper in Kaapstad begin voordat sy na troufotografie oorgeskakel het – waar sy tien jaar lank meer as 400 troues vasgevang het.

Dit was in hierdie tyd dat Nieuwoudt bande met talle bloemiste gesmee het en besef het dat baie van die blomvariëteite wat by troues en geleenthede gebruik word nie kommersieel in Suid-Afrika gekweek is nie, maar teen hoë koste ingevoer moes word.

Adene Nieuwoudt, eienaar van Adene’s Farm Flowers. (Foto: Facebook/Adene Nieuwoudt.)

Sy het gedurende dié tyd reeds op ʼn plaas saam met haar man, wie se familie sedert 1934 die Platvlei-vrugteplaas besit, gewoon en is geïnspireer om self die blombedryf te betree.

“Ek het begin deur net ʼn klein bossie blomme in my agterplaas te plant. Toe dit mooi groot was en geblom het, het ek dit gestileer en gefotografeer, en op Facebook verkoop. Dit was binne tien minute uitverkoop en ek het vinnig besef daar is ʼn mark vir skaars blomme wat jy op Pinterest sien, maar nie baie maklik plaaslik kon verkry nie.”

Dié plaas, in die Breederiviervallei-streek van die Wes-Kaap, huisves vandag ses hektaar blomme van meer as 200 verskillende variëteite, waaronder 50 000 dahlias, 4 000 hortensias, duisende lisianthuse en vele meer.

Sy vertel dat haar benadering tot boerdery ʼn koesterende een is. Sy fokus op omgewingsvriendelike groeimetodes, omgewingsverantwoordelike praktyke en glo in ʼn gesonde balans tussen plaas- en familielewe.

Sy erken dat dit nie altyd maklik is om ʼn vrou in boerdery te wees nie, maar sy het geleer hoe om uit te staan ​​en volg ʼn intuïtiewe vroulike benadering tot haar werk.

“Ek geniet dit om my eie baas te wees, want ek kan my eie visie volg, my eie sake-idees uitdink en daar is regtig niemand wat my terughou nie. Ek kan net my eie instink volg,” sê sy.

Nieuwoudt se reeks pronk in Mr Price-winkels. (Foto: Facebook/Adene Nieuwoudt.)

Sy is ook een van drie vroue wat onlangs genooi is om in samewerking met Mr Price Home ʼn reeks pasgemaakte huisware ter ere van Vrouemaand te skep. Nkhensani Rikhotso, eienaar van Her Merakai, en Keneilwe Mokoena, visuele kunstenaar, is ook gekies om deel van dié inisiatief te wees.

Nieuwoudt se gunstelingblom – ʼn dahlia – het gedien as die hoofinspirasie van haar reeks. “Ons het die dahlias en ander blomme van ons plaas gebruik om ʼn pragtige, romantiese en vroulike ontwerp te skep wat ons op dié produkte gebruik het.”

Sy het ook haar fotografiese vaardighede met haar liefde vir blomme gekombineer en self blommetema-beelde gefotografeer wat pronk op items soos duvetoortreksels, kussings, tafeldoeke én kerse.

Adene’s Farm Flowers groei ook steeds met duisende besoekers wat elke jaar na haar plaas stroom om tussen die blomme te loop. Haar toekomsdroom is om die onderneming oor die volgende vyf jaar te verdubbel, in vennootskap met ʼn Holland-gebaseerde pioenroosmaatskappy, om ʼn verdere ses hektaar pioenrose te kweek en dan na Holland en oor die wêreld heen uit te voer.

Nieuwoudt se huiswarereeks is tans by Mr Price Home-winkels landwyd beskikbaar.