[Video] Afrikaanse sanger vra steun vir nasionale biddag

‘n Skermskoot uit die video

Die Afrikaanse sanger Jay du Plessis het mense uitgedaag om op 22 April vanjaar bymekaar te kom vir die nasionale biddag op die Wilde Als-plaas, noord van Bloemfontein, sodat mense in massagroepe vir Suid-Afrika kan bid.

Jay het in ʼn video op Facebook gesê hy en ʼn groep van sy vriende, wat hulself die Ruiters vir Vrede gedoop het, gaan op 16 April te perd die pad tussen Verkykerskop en Bloemfontein aandurf.

Die eindbestemming van die tog is die Wilde Als-plaas vir die evangelis Angus Buchan se “It’s Time”-nasionale biddag.

“Hierdie byeenkoms is vir ons land om te bid sodat geweld en korrupsie kan endkry en natuurlik ook plaasmoorde. Daar is net een manier hoe ons dit gaan regkry, en dit is as ons saamstaan en die Here om hulp smeek,” vertel hy in die video.

“Dit is tyd dat ons saamstaan teen die bose wat ons land so verniel en ons mense so vermoor. Net God kan ons verlos van die geweld en ekonomiese onderdrukking en ek wil jou nooi om saam met my jou vertroue in God te kom hernu. Ek wil jou nooi om nie meer skaam te wees om te roep na God nie en saam met ons te kom smeek vir vergifnis dat ons as volk die rug op God gedraai en as Afrikaner vergeet het van die Gelofte wat ons met God aangegaan het. Net Hy kan ons beskerm. Net sy liefde kan ons red.”

Die sanger het ander mense uitgedaag om ook op 16 April met hul perde na die byeenkoms te vertrek “sodat daar soveel moontlik mense by die byeenkoms is”.

Hy het verder gesê dié week lange tog is nie noodsaaklik nie, maar het gesmeek dat mense wel op die biddag in massagroepe bymekaar moet probeer kom.

“Die probleem is baie groter as wat enigiemand besef. Geweldsyfers in Suid-Afrika is skrikwekkend hoog en mense draai hul gesig daarvan weg omdat hulle nie weet wat om te doen nie. Jy hoef nie self perd te ry nie, kom net na die biddag en kom ons probeer ʼn verskil maak,” sê hy.

Maroela Media het vroeër berig dié biddag sal nie regstreeks uitgesaai word nie. “Mense vra of ons dit regstreeks gaan uitsaai. Nee, ons gaan nie. Hoekom? Want die mense moet self kom. Almal kan in hulle eie huise bid, maar dis nie wat God wil hê nie,” het Buchan in ʼn video gesê.

Meer as 5 000 vrywilligers is reeds by die reël van die biddag betrokke om die sukses daarvan te verseker. Buchan het gesê hy verwag een miljoen mense, en dat God in gebed vir hom ʼn groot belofte oor dié dag gemaak het.

“God gaan op 22 April teenwoordig wees daar. Mense sal in hul sitplekke genees word. Dit het al gebeur dat mense letterlik uit hulle rolstoele opstaan en begin loop. Jy wil nie hê jou kinders moet jou eendag vra: ‘Pa, was jy daardie dag daar toe die Here Suid-Afrika kom besoek het?’ en jy moet nee sê nie.”

Mense wat die geleentheid bywoon, sal hulle eie kos en water vir die dag moet bring.

Lees meer oor nasionale biddag op Maroela Media.

SHARE GROOT ASB!!!! Wat maak jy 22 April? Jy kom Bloemfontein toe na Angus Buchan se byeenkoms vir Vrede in ons land! #IT'sTIME! Ons is n groep boere wat besluit het om die hele week vanaf Paas Sondag 16 April te wy aan die saak en ons gaan met ons perde die tog aanvat vanaf Verkykerskop na Bloemfontein. Ons wil jou nooi om ook jou eie groep te stig en vanaf jou dorp of plaas te ry sodat ons almal daar op die dag kan bymekaar kom en ons kragte bymekaar kan span om te bid vir ons boere en ons land en vir Vrede! Ons het sommer dadelik GROOT steun gekry vir die tog vanuit alle oorde en ek is opgewonde en dankbaar vir die geleentheid. Dit is tyd dat ons saamstaan teen die bose wat ons land so verniel en ons mense so vermoor. Ons is van mening dat net God ons kan verlos van die geweld en ekonomiese onderdrukking en wil jou nooi om saam met ons jou vertoue in God te kom hernu. Ek wil jou nooi om nie meer skaam te wees om te roep na God nie. Ek wil jou nooi om saam met ons te kom smeek vir vergifnis dat ons ons rug gedraai het op God as volk en dat ons as Afrikaner vergeet het van die Gelofte wat ons met God aangegaan het. Net Hy kan ons beskerm. Net Sy liefde kan ons red. Uit my hart bedank ek vir Phalaborwa Ford Caring Daisies Jay VIP Club AfriForum Miami Canners Safari Outdoor en almal wat nog skenkings gemaak het om hierdie tog moontlik te maak. Ons is reeds besig om ons perde lekker vet en fiks te maak vir die 450km rit. Bring jou perd en kom val by ons in op Sat 22 April. Ons KAN n verskil maak en JY kan deel wees daarvan. Ons is die #RuitersVirVrede en jy is genooi. #StopDiePlaasmoorde Share GROOT ASB die post met almal wat die Een Almagtige God dien!

Posted by Jay du Plessis on Monday, 27 March 2017

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

82 Kommentare

jongste oudste gewildste
charmaine

Ek glo my God is orals, my God gaan nie verlof neem en die 22 April net in Bloem opruk nie.
Dit is ook onmoontlik om te verwag die hele land op in Bloem wees, En op Sondag die 23ste sal ek my kerkdiens bywoon en tot my God bid en Hom loof. AMEN

Disselboom

Interessant dat dit met die steun van Afriforum is.

Rika

Ek dink die biddag is n awesome idee. Dit is vir my baie sleg dat dit nie uitgesaai gaan word of selfs net n link waar jy kan click om dit “by te woon” vanaf jou FB of rekenaar of selfs jou foon nie. Daar is baie mense wat dit graag wil bywoon, soos ekself en my 2 kinders maar wat dit dalk nie kan bekostig om deur te ry nie. Wat dalk nie slaap plek kan kry nie of wat net werklik finansieel nie sterk genoeg is om van ver af deur te ry nie. Nou word die geleentheid… Lees meer »

Piet Pompies

Die dorp moet Verkykerskop wees en nie Verkykersdorp.

Trots Afrikaans

Mat 5:5-15 Verder, as julle bid, moet julle nie soos die skynheiliges wees nie. Hulle hou daarvan om in die sinagoges en op die straathoeke te staan en bid sodat die mense hulle kan sien. Dit verseker Ek julle: Hulle het hulle beloning klaar weg. Nee, as jy bid, gaan na jou kamer toe, maak die deur toe en bid tot jou Vader wat jy nie sien nie. Jou Vader wat sien wat verborge is, sal jou beloon. Wanneer julle bid moet julle nie soos die heidene ‘n strotvloed van woorde gebruik nie. Hulle verbeel hulle hulle gebede sal verhoor… Lees meer »